Bya Ssemakula John
Botswana
Kamalabyonna Charles Peter Mayiga asisinkanye akulira Abataka mu Botswana (Chief of Chiefs) Kgosi Puso Kaburone nebateesa ku ngeri ez’enjawulo gyebasobola okuyambako okukomya Mukenenya mu mawanga gabwe ne Afirika okutwalira awamu.
Ensisinkano eno eyindidde Botswana ku Lwokusatu ku makya nga Kaburone abadde awerekeddwako omukungu w’Eby’obulamu okuva mu Gavumenti ya Botswana Ontiretse Letlahare nakulira ekitongole ki UNAIDS mu Botswana Alankar Malviya.
Oluvannyuma lw’ ensisinkano eno Katikkiro Mayiga ategeezezzza nti bano bababuulidde ku nkola ez’enjawulo Buganda zeekozesa omuli; Emipiira gy’Amasaza, Emisinde gya Kabaka, Ebyooto era nebababuulira engeri Kabaka gyakubirizza abasajja okwekuuma Mukenenya.
Owek. Mayiga era agambye nti bano babategeezezza nti mu nsisinkano eno bafunyemu ebyokuyiga era bajja kubiteeka mu nkola ku butaka kuba nabo abantu babwe babawuliriramu nnyo era babasaamu ekitiibwa.
Katikkiro Mayiga agasseeko nti boogedde neku nsonga z’obukulembeze kuba Botswana yemu ku nsi ezisinga okulaakulana n’okubeeramu obutebenkenvu mu Afirika naye kino bakituuseeko olw’okuba abakulembeze b’ennono baweebwa enkizo mu bukulembeze bw’eggwanga.
Ensisinkano eno yeetabiddwamu akulira okukunga abantu mu kitongole ki UNAIDS Uganda, Sarah Nakku, Omukungu Josephine Nantege awamu ne Minisita Robert Sserwanga.