Bya Ssemakula John
Maanyi – Busujju
Katikkiro Charles Peter Mayiga asabye abantu kukulima emmwanyi bagatteko okwekolamu ebibiina by’obwegassi okusobola okufuna mu kirime ky’ emmwanyi.
Okwogera bino Katikkiro abadde mu Ssaza lye Busujju mukulambula abalimi b’emmwanyi n’okuggalawo omwoleso gw’ebyobulimi oguyindidde mu ggombolola ye Maanyi ku kisaawe kye ssaza nasaba gavumenti obutalagajjalira byabulimi.
Owek. Mayiga alambudde ennimiro ez’enjawulo okuli eya Hassan Ssebaggala mu ggombolola ye Ngandwe, Christopher Mujabi ow’e Maanyi ne Edward Nsobya e Kabayenga era asinzidde wano nasaba abantu bulijjo obutaggwamu ssuubi.
“Abantu bangi bwe boogera bakoona ku bizibu oba ebisomoozo ne Minisita ababulidde. Eddagala ekkulu erikulembera byonna baliyita Ssuubi. Bwoggwamu essuubi mu myaka egy’obuvubuka ekiddirira byebyo Minisita byabadde agamba. Omuvubuka nga Mujabi atuwa essuubi nti wadde ebizibu webiri naye eddagala tulirina, ” Kamalabyonna Mayiga bw’agambye.
Owoomumbuga ategezeza nti eby’obulimi okuva edda nedda byebiyimirizaawo Buganda ne Uganda okutwaliza awamu bwatyo nasaba gavumenti obutabigayaalirira era nasaba abalimi okufaayo ku mutindo.
Minisita w’ebyettaka, obulimi, obutondebwensi ne Bulungibwansi asinzidde wano nasaba abantu okukomya okutyoboola obulungi bw’ensiera bafube okubuzaawo.
Ate Minisita omubeezi ow’ebyobulimi n’obulunzi, obwegassi n’obusuubuzi Owek. Hajji Amis Kakomo alaze nti emmwanyi ekuze ebitundu 35% nga kati yiika emitwalo 25000 zezirimiddwa mu Buganda.
Ye omwami w’essaza lya Busujju, Kasujju Mark Jjingo Kaberenge yeebazizza Kamalabyonna olw’okubalungamya entakera ekibasobozeseza okukola emirimu gy’Omutanda nebasobola okutumbula embeera z’abantu be.
Abakulembeze ba gavumenti eyawakati okuli Omubaka omukyala owe Mityana Joyce Baagala Ntwatwa ne Ssentebe wa Mityana Patrick Nshiimye baweze okugondera n’okugoberera enteekateeka z’Obwakabaka wakati mukukwasizaako abaami ba Kabaka e Busujju.
Omukolo guno gwetabiddwako abantu mu biti ebyenjawulo n’abaana bamasomero era ng’ebitongole by’ Obwakabaka omuli Weerinde yinsuwa, Majestic Brands, Bank ya Uganda enkulu, Olwendo, SACCO z’Obwakabaka, n’abantu abalala booleseza ebintu eby’enjawulo mu mwoleso guno.
Katikkiro awerekeddwako Minisita w’Ettaka Obulimi n’obutondebwensi Oweek Hajjat Mariam Nkalubo Mayanja, Oweek Henry Sekabembe Kiberu, Oweek Noah Kiyimba, Oweek Joseph Kawuki, Oweek David Kyewalabye Male, Kasujju Mark Jjingo Kaberenge II , Mukwenda David Nantaggya, Kitunzi Celestino Musisi, abakiise mu Lukiiko lwa Buganda n’abantu abalala.