Bya Francis Ndugwa
Namanve – Kyaggwe
Obwakabaka bwa Buganda buziza bugya omukago gwabwo ne kampuni ekola Langi eya Plascon nga mu nteekateeka eno bano bakusigala nga bayooyoota ebizimbe by’Obwakabaka okusiiga Langi okumala emyaka esatu n’okuwagira emipiira gy’ Amasaza.
Omukago guno gugendereddwamu okutumbula obwasseruganda wakati w’Obwakabala bwa Buganda ne Kampuni ya Plascon, era Kamalabyonna Charles Peter Mayiga alambudde ekkolero lino okulaba engeri gyebatambuzaamu ebintu.
Eno Kamalabyonna Mayiga alambudde ebifo eby’enjawulo mu kkolero lino omubadde webatabulira Langi,webakeberera omutindo, newebateeka agenda mu katale n’ebifo ebirala.
Owek. Mayiga asisinkanye asisinkanye abakozi abawerera ddala lunaana nayogerako gyebali nasaba abakozi okukola n’amaanyi gabwe gonna okuyimirizzaawo kkampuni eno.
Mukuumaddamula Mayiga ategeezezza nti bamusigansimbi nga bano basasula omusolo mungi ddala oguyambako mu nkulakulana ye ggwanga n’okuwa bannayuganda emirimu kyokka gavumenti bwetuuka okukola enguudo ebeerabira ekisanyalaza emirimu gyabwe.
Akulira ekitongole ki Majestic Brands ekivunaanyizibwa ku bujjuvirizi obw’enjawulo, Remmy Kisakye ategeezezza nti omukago guno bagulinnamu esuubi lingi era nti basuubira okuguggyamu ebibala ebirabwako
Ssenkulu wa kkampuni ya Plascon mu Uganda Santosh Gumte yeebazizza Ssaabasajja Kabaka okubawa omukisa okukolagana nabo kuba kino kibayambye okwerula emikisa gyabwe.