Bya Gerald Mulindwa
Gayaza – Kyaddondo
Kamalabyonna Charles Peter Mayiga alambudde abayizi abali ku ssomero lya Hormisdallen e Gayaza Kyaddondo nabakuutira okunyweza obuntubulamu bwebaba baagala okufuuka ab’omugaso.
Okulambula kuno Owek. Mayiga akukoze ku Lwakubiri nga abadde awerekeddwako Minisita w’ebyenjigiriza, ebyobulamu ne Woofiisi ya Nnaabagereka, Owek. Cotilda Nakate Kikomeko ne Ssenkulu wa Nnabagereka Development Foundation, Omuk. Adrian Mukiibi.
“Twagala tulabe nti mufuuse bantubalamu naddala nga muyingidde Siniya esooka , bino byemuyize wano bijja kubayamba okubeera abantubalamu, aboobuvunaanyizibwa, banyiikivu, beesimbu, beerufu, abakola emikwano emirungi, okutuukiriza obuvunaanyizibwa obubakwasiddwa” Owek. Mayiga bw’annyonnyodde.
Katikkiro Mayiga agasseeko nti omuvubuka bw’atandika okuvubuka n’omubiri gwe nagwo gukyuuka ng’eno y’ensonga lwaki bano balina okusalawo ebyo ebibayamba nga basemberera okuvubuka kuba okusalawo kwebakola kutegeeza kinene ku bulamu bwabwe obw’omu maaso.
Abasabye beewale ebikolwa omuli, okukozesa ebiragalalagala kubanga byonoona ebiseera eby’omumaaso, obutasaayo mutima nga basomesa, obuteyonja nakyo kibi.
Abasaakaate bamulaze byebayize omuli, okukola emigaati ne keeki, okutaputa ebyafaayo bya Buganda omuli n’emirembe gya ba Ssekabaka, amannya ga Kabaka, okufumba, okukola amanda, n’abato abali wansi w’emyaka 6-8 bamulaze bwebasoma ekitabo n’okuzannya.
Bano era naddala abali mu “Secondary” naabo abasemberedde okutuukayo, balaze Katikkiro emitendera egiyitwamu okusimba emmwaanyi, okuzongerako omutindo okutuukira ddala ku katale.
Ekisaakaate kiggalwawo ku Lwomukaaga luno oluvannyuma lwa ssabbiiti bbiri nga abaana babangulwa mwebyo ebinaabafuula abatuuze aboomugaso eri eggwanga.
