Bya Shafic Miiro
Kampala – Kyaddondo
Katikkiro Charles Peter Mayiga asabye abantu bulijjo obutagayaalirira nkola ya bwannakyewa naye beetegeke bulungi bwebaba baagala okugifunamu obulungi.
Obubaka buno Owek. Mayiga abuweeredde mu Kampala ku Protea Hotel bw’abadde asisinkanye Bannalotale abeegattira mu kiraabu ez’enjawulo okuli eya Kitante, Kampala Impala ne Kampala Ssese Islanda ku Lwokutaano akawungeezi.
Mukuumaddamula Mayiga wano yeebazizza Rotary olw’emirimu egy’obwannakyewa gye bakola ate n’okukolagana obulungi n’Obwakabaka nebasobola okutumbula embeera z’abantu ba Nnyinimu.
Owek. Mayiga agamba mu kuteekateeka Bannakyewa, omulimu gwe bagenda okukola gulina okumanyibwa obulungi, ate nabo abagenda okugukola nebafuna obukugu obwetaagisa okukola omulimu ogwo.
Mayiga agasseeko nti kikulu okuteekateeka emirimu gye bakola, okulondoolola engeri gye gitambuzibwamu ate n’okusiima abo abakoze bulungi.
Bbo Bannalotale beebazizza Kamalabyonna olw’okutumbula embeera z’abantu mu Buganda era bamutonedde ebirabo okutuusa okusiima kwabwe ku nsonga eno.
Mu lukuŋŋaana luno Katikkiro awerekeddwako Omumyuka we Owookubiri Oweek. Robert Waggwa Nsibirwa, n’Omumyuka w’Omukubiriza w’Olukiiko Oweek. Hajj. Ahmed Lwasa nga bano bonna Bannalotale.