Bya Miiro Shafik
Mmengo – Kyaddondo
Katikkiro wa Buganda, Owek. Charles Peter Mayiga akubirizza abaddu ba Allah abali mu omutuvu ogwa Ramadan okunyweza obumu ne bannaabwe ab’enzikiriza endala zonna ng’akikaatiriza nti Kabaka ayagala nnyo abantu be bona babeere bumu.
Katikkiro Mayiga bino abyogeredde ku Mbuga y’Obwakabaka enkulu Bulange e Mmengo bw’abadde ku mukulo gw’okusiibulula abasiraamu ogutegekeddwa Obwakabaka bwa Buganda nga bweri enkola eya buli mwaka.
“Ssaabasajja Kabaka yasiima tubeere n’enteekateeka y’okusiibulula Abasiraamu mu Bwakabaka era ng’eno esimbye butereevu mu Ssemasonga ey’okutaano ey’obumu. Mu mbeera zaffe ez’obulamu tubeera n’ebitwawula; eddiini, eggwanga, ekikula n’ebirala. Kyokka okutegeera nti tuli bawuufu naye tulina okukolagana ky’ekisinga obulungi” Katikkiro Mayiga.
Katikkiro Mayiga era asinzidde wano n’akubiriza abasiibi okweyisa obulungi ng’agamba nti omuntu bw’asiiba ate n’asigala ng’akola ebikyamu n’okuyisa obubi abalala olwo abeera akottokera busa, bwatyo n’asaba abasiibi bakole ebyo ebisanyusa Omutonzi waabwe. Yebazizza bonna abeetabye mu nteekateeka eno ey’okusiibulula Abasiraamu n’abaagaliza ekiseera ekirungi mu nnaku ezisigaddeyo.
Sheikh Yasin Kiweewa mu bubaka bwa Supreme Mufti wa Uganda Shiekh Muhammad Galabuzi bw’atuusizza, yebazizza nnyo Obwakabaka bwa Buganda olw’enteekateeka eno gy’agambye nti eyongera okunyweza obumu mu baddu ba Allah. Ono asiimye Obwakabaka kaweefube gwe buliko ow’okulwanyisa mukenenya naddala ng’abasajja be bakutte omumuli era naye asabye abaami okubeera abasaale mu kulwanyisa n’awokeera w’obulwadde bwa mukenenya ku lw’okutaasa omwana ow’obuwala.
Ssentebe w’Olukiiko olukulembeddemu enteekateeka y’omukolo guno nga ye Mumyuka w’Omukubiriza w’Olukiiko lwa Buganda Oweek. Ahmed Lwasa yebazizza abagenyi bonna abeetabye mu nteekateeka eno ne bannamikago bonna abakwataganye n’Obwakabaka okuggusa enteekateeka eno.
Omukolo guno gwetabiddwako Baminisita mu Gavumenti ya Kabaka, Abataka Abakulu b’Obusolya, Ssabaganzi Emmanuel Ssekitooleko, Abaami ba Kabaka ku mitendera egy’enjawulo, Bassenkulu b’ebitongole, Bannamikago b’Obwakabaka nga bakulembeddwamu Airtel, Abamu ku babaka abayiseemu okukikirira abantu mu lukiiko lwe ggwanga olukulu, Bamasheikh ab’enjawulo n’abantu abalala bangi.
