Bya Shafik Miiro
Entebbe -Busiro
Katikkiro Charles Peter Mayiga akomyewo okuva e Bungereza gyeyagenda n’abamu ku Baminsita b’Obwakabaka okutongoza ttabamiruka wa Buganda mu Bulaaya ng’eno bakulunguddeyo ennaku ssatu. Ttabamiruka ono agendererwamu okukumaakuma abantu ba Kabaka abawangaalira ebweru wa Buganda.
Bwabadde ayogerako eri bannamawulire ku kisaawe ky’ennyonyi Entebbe, Kamalabyonna ategeezeza nti ensonga enkulu eyavuddeko okutongoza ttabamiruka ono kwe kulaba ng’abantu ba Ssaabasajja abawangaalira e Bulaaya bamanyisibwa ebifa eka, okumanya embeera gyebalimu n’okwongera okubakumaakuma nga bali bumu. Wano wategeerezza nti bajja kuddangayo buli luvannyuma lwa myaka ebiri ng’omulundi oguddako ttabamiruka ajja kubeera Germany.
Mukuumaddamula awabudde ababeera e Bulaaya ku nsonga y’okusiga ensimbi nga bano abateegezeza nti basobola okwegatta nebekulaakulanyiza wamu nga bayita mu kusiga ensimbi. Katikkiro agamba e Bulaaya eriyo abantu abakola emirimu egivaamu ensimbi eziwera omuli bannamateeka, abasawo, bayinginiya n’abalala ate nga akatale kaayo kagazi n’ensimbi zabwe nnungi bwozigeraageranya n’eza Uganda kale nga kino kisobokera ddala .
Owomumbuga asanyuse olwa bannayuganda abasinziira e Bulaaya nebalima kuno emmwanyi n’abo abazimbye ebizimbe mu bitundu bya Uganda eby’enjawulo era abakuudidde obutaddiriza. Bano abateegeezza nti kirungi okukoppa abagwira abasiga ensimbi ku mawanga ate amagoba ne bagakozesa okulaakulanya ensi zaabwe era abasabye okusiga embala eno mu baana baabwe
Ng’oggyeko okutongoza ttabamiruka, olugendo lw’e Bulaaya luno lukoleddwamu ebintu eby’enjawulo omuli okutuuza Omwami wa Kabaka atwala essaza lya Bungereza ne Northern Ireland wamu n’Abaami abalala , okusisinkana abavubuka, okwetaba mu kuziika kojja wa Kabaka Dr. Arnold Bisase abadde abeera e Bungerea era nga lwafundikiddwa n’okukyalira Omulangira wa Bungereza, Prince Edward Antony Louis