Bya Ronald Mukasa
Gayaza – Busiro
Katikkiro Charles Peter Mayiga akubirizza abavubuka okujjumbira obwegassi mu mirimu gyebakola nga baluubirira okufunamu ensimbi ezinaabayamba okutumbula embeera zabwe.
Owek. Mayiga bino abitadde mu bubaka bwatisse Minisita w’Amawulire n’ Okukunga era omwogezi w’Obwakabaka Owek. Israel kazibwe Kitooke bw’abadde amukiikiridde ku mukolo gw’okuggalawo omusomo gw’ Abavubuka mukulunda enkoko ogumaze ennaku ttaano e Gayaza mu Busiro.
Kamalabyonna abavubuka abawadde amagezi okukola n’ekibalo mu buli kyebakola kibayambye okwewala okufiirizibwa.
Ono era abakubirizza okukola n’okwagala nga banyiikivu saako nokukozesa obuyiiya nga batondawo obutale bw’emirimu gyabwe nga bakozesa emitimbagano n’emikutu emirala egisobola okubayamba okumanyisa abantu byebakola.
Kululwe, Owek. Kazibwe abavubuka bano abeebazizza olw’okubeera abawulize eri Nnamulondo era nabakunga bulijjo okugoberera okulambikibwa okuva embuga okusobola okutambulira awamu n’enteekateeka za Nnyinimu kubanga abantu be abaagala bali bulungi.
Ye Minisita w’Abavubuka, Emizannyo n’Ebitone, Owek. Robert Sserwanga abavubuka bano abakuutide okuteeka munkola byonna byebayize mu musomo guno okusobola okukyusa embeera zabwe n’okwenogera ku nsimbi eziri mu bulunzi n’obulimi.
Minisita yeebaziiza Bannamukago aba Biwooma Farmers Ltd. olw’okubangula abavubuka bano mu bulunzi bw’enkoko ekigenda okukyuusa obulamu bwabwe basobole okulaakulana.
Ssaabawandiisi wa Buganda Youth Council, Kijambu William yeebaziiza minisita Sserwanga olw’okukolerera okutumbula embeera z’abavubuka mu Buganda nasuubiza nti bakutwala mu maaso byebayize babisomese ne bannabwe abalala.
omusomo guno gwatekeddwa Minisitule y’ Abavubuka, Emizannyo n’Ebitone nga gwetabiddwamu abavubuka okuva mu bitundu by’eggwanga ebitali bimu .