Bya Samuel Stuart Jjingo
Bulange – Kyaddondo
Katikkiro Charles Peter Mayiga akubirizza abaana abato okufaayo ennyo ku misomo gyabwe basobole okutuuka mu bifo by’obuvunaanyizibwa bye beegomba.
Kamalabyonna bino abitadde mu bubaka bw’atisse Minisita wa Gavumenti ez’Ebitundu Owek. Joseph Kawuki bwabadde atikkula oluwala olusobye mu bukadde 61 okuva mu masaza 3; Kyaddondo, Buddu ne Kkooki.
“Tosobola kwegwanyiza kubeera mwami wa Kabaka, mwami wa LC oba Minisita wa Kabaka nga tolina buyigirize,” Owek. Mayiga asibiridde abaana b’amasomero entanda ya kunyweza kkalaamu, okufaayo ennyo mu kusoma kwabwe batuuke ku biruubirirwa byabwe.
Kamalabyonna yebaziza buli eyenyigiddemu mu mikolo gy’okujaguza amatikkira ga Ssaabasajja ag’omulundi ogwa 32 okuviira ddala ku bulungibwansi, ensiisira z’ebyobulamu, ez’amateeka, ebyoto na buli enteekateeka yonna. Ajjukiza Obuganda obubaka bwa Nnyinimu mwe yebaliza Abaami be olw’omulimu gwe bakoze okuyimirizaawo Obuganda, era n’okulabula okwegendereza abaseketerezi b’Obwakabaka, obutagulirirwa bannabyabufuzi nga babawa obunyebwa. Abasabye babeefumitirizeeko wakati mu kaseera nga betegekerera akalulu ka bonna.
Omumbejja Mariam Ndagire, Omwami w’eggombolola ya Mut II Nabweru ku lw’Abaami b’eggombolola agamba nti bayise mu mitendera okunoonya oluwalo olusobye mu bukadde 43 nga batongozza enkola gye baatuuma Mutongole Model, Nabweru Model ne Muyizi model era kino kibasobozeseza okukumaakuma abantu ba Ssaabasajja Kabaka nga batambulira wamu.
Oluwalo lwetabiddwamu bannabyabufuzi ab’enjawulo, n’amasomero ate eggombolola okuva mu masaza gano; Buddu: Mut XIX Kasasa, Kkooki: Mut I Kyalulangira, Mut II Kifamba, Ssaabagabo Buyamba, Ssaabawaali Byakabanda ne Mut IV Kiziba, ne Kyaddondo: Mut II Nabweru.