Bya Shafic Miiro
Bulange – Mmengo
Mukuumaddamula Charles Peter Mayiga asabye ebitongole by’Obwakabaka okuwuliziganya era bikologanire wamu okusobola okuggusa obuvunaanyizibwa Omutanda bweyabakwasa.
Bino Kamalabyonna Mayiga abyogeredde mu nsisinkano gy’abaddemu n’abakozi b’ ebitongole okuli ekya Nkuluze, Nnaabagereka Development Foundation ne Kabaka Foundation.
Owek. Mayiga ategeezeza nti mu Buganda abakozi bonna baweereza Kabaka, nga mu ngeri yonna balina kutambulira wamu okutuukiriza emirimu gya Nnyinimu.
Akubirizza abakozi okubeera abayiiya, abeerufu era ng’emirimu gya Kabaka bagikola n’okwagala, obutakukuta na mirimu n’okubeera abeesigwa. Bano era abakuutidde okuwa bakama baabwe ekitiibwa.
Katikkiro agamba nti waliwo okugenda mu maaso mu mirimu gy’Obwakabaka era yeebazizza abakulira ebitongole n’abakozi n’abasaba okwongera okunyiikira n’okunyiriza emirimu gye bakola, olwo Buganda eyongere okukulaakulana.
Ye Minisita w’Enkulaakulana y’Abantu ne Woofiisi ya Nnaabagereka, Owek Coltilda Nakate Kikomeko asinzidde mu nsisinkano eno ne yeebaza Katikkiro olw’okuwangayo obudde okulambula ebitongole, ky’agambye nti kizzaamu abakozi amaanyi mu mirimu gye bakola.