Bya Stephen Kulubasi
Bulange – Mmengo
Katikkiro Charles Peter Mayiga akubirizza abazadde abalina abaana abaliko obulemu okwewala okubasosola wabula babazzeemu essuubi kiyambe abaana abo okufuna obuvumu okwang’anga ensi bafuuke ab’omugaso.
Obubaka buno Kamalabyonna abuweeredde ku mbuga y’Obwakabaka enkulu Bulange e Mmengo bw’abadde asisinkanye ab’ekitongole ekirafuubanira obwenkanya ekya ‘Equal Opportunities Commission’ ku Lwokuna.
Owek. Mayiga abasabye bawe abaana bano omukisa babaweerere ate babakubirize okwenyigira mu bintu ebyenjawulo nga katemba n’ebyemizannyo obulamu bwabwe bubeere nga bweyagaza.
Ow’omumbuga Mayiga yennyamidde olw’abazadde abakweka abaana babwe abaliko obulemu nebalemwa okubayonja nabasaba okukyusaamu kubanga bangi abaliko obulemu abakoze ebinene okusinga abataliiko bulemu.
Katikiro asinzidde mu nsisinkano eno neyeeyama nti Obwakabaka bugenda kwongera okusoosowaza abantu abaliko obulemu nga buwagira enteekateeka z’ekitongole kino okubayambako okwongera okugaziya emikisa gyabwe.
Owek. Mayiga azzeemu okukaatiriza obukulu bw’okumalawo enkaayana zettaka nti okussa mu nkola amateeka agaliwo kyekijja okukumalawo n’abantu abaliko obulemu basobole okweyagalira mu ggwanga lyabwe.
Ssentebe wakakiiko kano akozeseza omukisa guno nategeeza Katikkiro ku mbeera endala gyebasanga ebasomooza omuli ekibbattaka, obutabanguko mu maka n’ensonga z’amateeka naasaba Obwakabaka okubakwasizaako.
Akakiiko kakutte mu ndyanga nekawaayo obukadde butaano okukwasizaako mu nteekateeka y’okujaguza Amatikkira g’Omutanda agomulundi ogwamakumi asatu (30).