Bya Francis Ndugwa ne Ronald Mukasa
Bulange – Mmengo
Mukuumaddamula Charles Peter Mayiga akuutidde abakulira ebitongole by’Obwakabaka ebikolera ku kizimbe Bulange okunyweza obuyiiya n’obwerufu okusobola okugasa abantu ba Beene n’okutuukiriza ebigendererwa ebyabitandisaawo.
Obubaka buno Kamalabyonna Mayiga abuwadde bw’abadde alambula ebitongole ebyenjawulo ku kizimbe Bulange e Mmengo ku Lwokusatu.
Mu bitongole byalambudde mulimu BUCADEF, Majestic Brands, ne Bicul era bino abyebazizza olw’omulimu gwebikola nabisaba okwongeramu amaanyi era bikole n’okwagala.
Owek. Mayiga annyonnyodde nti singa bano bakola n’obunyiikivu Buganda ejja kusobola okudda ku ntikko kuba ebitongole by’Obwakabaka bjja kuba bitambula bulungi era nga bigenda mu maaso.
Mu kulambula kuno Katikkiro Mayiga abadde awerekeddwako Omumyuka Owookubiri owa Katikkiro era Omuwanika w’Obwakabaka, Owek. Robert Waggwa Nsibirwa, Minisita w’Amawulire Okukunga era Omwogezi w’Obwakabaka, Owek. Israel Kazibwe Kitooke, Minisita w’Obulimi, Obulunzi n’obwegassi, Oweek Hajji Amisi Kakomo, ne Ssentebe wamu ne Bboodi ya BUCADEF.