Bya Ssemakula John
Kampala
Eyavuganyizza ku ntebe y’Obwapulezidenti mu kalulu akawedde aka 2021, Joseph Kabuleta, yeegasse ku banne abalala n’awakanya ebyava mu kulonda.
Kabuleta yagambye nti ku byonna ssentebe w’akakiiko k’ebyokulonda, Simon Byabakama Mugenyi, bye yasoma byali tebikwatagana n’ebyo ebyava mu bifo ebyalonderwamu. Ono eyafuna obululu obuwera 45,424 nga bukola obutundu 0.44% bw’atyo bwe yeemulugunyizza ng’ayogerako n’omukutu gw’amawulire ogumu.
“Tewali kyanneewuunyisa ku ebyo byonna ebyaliwo. Nayingira mu lwokaano luno nga mbisuubira. Ebibalo ebyalangirirwa byonna byali biyiiye buyiiya.” Kabuleta bwe yagambye.
Yannyonnyodde nti mumativu nti eggwanga liriko ekkubo lye likutte.
“Nkyali ku kununulwa mu byenfuna kubanga gwe musingi gwa buli kimu, twagala Museveni y’aba Nnakyemalira asembayo okufuga eggwanga lyaffe.” Kabuleta bwe yagasseeko.
Kabuleta yawagidde Kyagulanyi olw’okuddukira mu kkooti okuwakanya ebyava mu kalulu n’agattako nti tewali ngeri yonna Museveni gye yali asobola kuwezaamu bitundu 50%.
Okusinziira ku byava mu kakiiko k’ebyokulonda, Museveni yawangula akalulu n’obukadde 6,042898 obukola ebitundu 58.38% ate Kyagulanyi n’akwata kyakubiri 3,631,437 n’ebitundu 35.08%.
Mu kalulu kano Patrick Amuriat Oboi owa Forum for Democratic (FDC) yafuna obululu 337,589 by’ebitundu 3.26 %, Nancy Kalembe n’afuna 38,772 obukola ebitundu 0.37%, John Katumba yafuna 37,554 by’ebitundu 0.36%, Nobert Mao n’afuna obululu 57,682 by’ebitundu 0.56%.
Mu balala, Willy Mayambala yafuna 15,041 obukola 0.15%, Mugisha Muntu Gregg n’afuna 67,574 by’ebitundu 0.65%, Fred Mwesigye yakung’aanya 25,483 nga buno bukola 0.25% ate munnamagye Henry Tumukunde n’afuna 51,392 by’ebitundu 0.50%.