Bya Ssemakula John
Lubiri – Mmengo
Abakulu okuva mu bitongole ebikuumaddembe balabudde abo bonna abeesomye okwetaba mu misinde gy’amazaalibwa ga Ssaabasajja Kabaka nekigendererwa ky’okubba n’okukola efujjo ku bantu abagenda okwetaba mu misinde gy’omwaka guno.
Okulabula kuno kukoleddwa amyuka omwogezi wa Kampala n’Emirilaano, Luke Owoyesigire bw’abadde ayogerako eri bannamawulire ku nteekateeka z’ebyokwerinda z’olunaku lw’ emisinde gya Kabaka egigenda okubaawo ku Ssande nga 16, April 2023.
Olukiiko luno lwetabiddwamu abakulu mu Poliisi, ab’amagye n’ekitongole ekivunaanyizibwa ku byokwerinda by’Obwakabaka ki KPU nga lukubiriziddwa RDC w’e Lubaga, Anderson Burora, abadde ayambibwako Omuduumizi wa Poliisi mu Kampala, Steven Tanui, ate Capt. Christopher Lutwama yabaddewp ku lw’eggye ly’Obwakabaka.
Owoyesigire agamba nti tebalina muntu yenna gwebagenda kukkiriza kutwala byabufuzi mu misinde gino kuba bagenda kukwatibwa.
Ono era asabye abantu bonna abanagenda mu Lubiri okugondera ebiragiro ebigenda okubaweebwa abakuumaddembe kuba byonna bireeteddwa lwa bulungi bwa bantu.
Wadde olukiiko luno terwakkiriziddwamu bannamawulire naye Afande Owoyesigire alambuludde ebyo ebiteeseddwako.
Ye omubaka wa pulezidenti mu gomboloola y’e Lubaga Anderson Bulola , aweze okufafagana n’abantu naddala abavubuka abaagala ogufuula omuze okutabika eby’obufuzi mu misinde gya Kabaka.
Ono alabudde buli muntu anetaba mu misinde gino okwewala okwambala engoye eziraga ebibiina by’obufuzi byonna oba okuyimba ennyimba z’ebyobufuzi mungeri y’okwemulugunya oba okususuuta bannabyabufuzi.
Kati giri emyaka 10 kasookedde Bwakabaka butandikawo nteekateeka y’emisinde ng’ebimu ku bikujjuko by’Amazaalibwa ga Kabaka
Bino webijjidde ng’ abantu ab’enjawulo bakyagenda mu maaso n’okugula obujoozi buno ku nsimbi emitwalo 2 ng’era Nnyinimu yasiima emisinde gy’Omwaka guno gibeere wansi w’omulamwa ogusaba Abaami okukulemberamu olutalo ku Mukenenya okusobola okutaasa abaana ab’obuwala.