Bya Samuel Stuart Jjingo
Lubaga – Kyaddondo
Ssaabasajja Kabaka atenderezza emirimu egikoleddwa eyali Omwami we ow’essaza Busiro, Ssebwana Oweek. Ponsiano Kawotto (P.K) Ssengendo.
Ekyaliko Omwami wa Kabaka ow’Essaza Busiro Ponsiano Kawotto asomeddwa mmisa y’okusabira omwoyo gwe mu Lutikko e Lubaga, eno obubaka bwa Kabaka busomeddwa Minisita wa Gavumenti ez’Ebitundu Oweek. Joseph Kawuki.
Omuteregga asaasidde nnyo nnamwandu Jessy Christine Ssengendo wamu ne bamulekwa, abazzukulu, ab’olugandan’abemikwano lw’omugenzi olw’okufiirwa omwagalwa waabwe, era amusiimye nnyo olw’emirimu gye yakolera Obwakabaka.
“Okumala ekiseera kiwanvu ddala, Omugenzi yali muweereza mu Bwakabaka mu Ssaza lyaffe ery’e Busiro: Tujjukira bulungi obuweereza bwe obwalimu ebibala era nga yakola bulungi emirimu gye wamu n’okukulaakulanya Essaza.” Kabaka Mutebi II.
Ku lwa Minisitule ya Gavumenti ez’Ebitundu Oweek. Joseph Kawuki agamba nti omugenzi yamuyigirako ebintu bingi ng’akyawereeza mu Gavumenti ya Ssaabasajja Kabaka omwali okukubiriza abaami ba Kabaka okubeera abakozi ennyo awamu n’okubeera n’ettendo nga abugiriza Kabaka we buli we yabeeranga agenze.
Ssaabasumba w’essaza ekkulu erya Kampala Paul Ssemogerere agamba nti omugenzi abadde teyegaana ddiini ye era mumativu nti afudde awesezza ekkanisa ya Kristu ekitiibwa olw’ebyo by’akoze ne mu ggwanga lino bwatyo asabye buli muntu yenna okumulabirako.
Ssaabasumba mwenyamivu olw’omulembe oguliwo ogutassa kitiibwa mu biraamo wano waasabidde abaana n’abazzukulu obutakyusa bubaka obuwandiike omugenzi bw’alese.
Nnamwandu w’omugenzi, Jessy Christine Ssengendo annyonyodde engeri bba gye yafa mu ey’obulumi era amutenderezza olw’omukwano gw’alaze abaana be ate nabo ne bamwagala.
Mw. Ssetimba Magoba y’ayogedde ku lwa bamulekwa, atendereza nnyo kitaabwe olw’eddiini gy’abadde nayo, obugabirizi bw’abadde awa abantu ab’enjawulo, omukwano eri abantu era asinzidde wano ne yeyama ku lwa banne okutuukiriza kitaabwe kye yabasaba okutwala mu maaso nga okubeera obumu awamu n’okusabira abagenzi mu famire yaabwe.
Oweek. Ssengendo yafuna akabenje bwe yali ava mu bbanka ekimuviriddeko okulumizibwa okumala ebbanga lino lyonna era yafa ku lwakutaano nga 27, Mukutulansanja 2026 ng’aweza emyaka 85.
Okusaba kunno kwetabiddwamu ba Katikkiro abawummula; Oweek. Joseph Mulwannyamuli Ssemwogerere, Oweek. Dan Muliika, Oweek. Eng. JB Walusimbi, abakiise mu Lukiiko lwa Buganda; Oweek. Rev. Elijah Kyobe, Oweek. Lauben Kalibbala, abakungu abalala okuva mu gavumenti ya Ssaabasajja Kabaka awamu n’eyawakati n’abantu abalala bangi nnyo.