Bya Miiro Shafik
Namirembe – Kyaddondo
Omwoyo gw’Omugenzi Lay Canon Rhoda Nakibuuka Nsibirwa Kalema gusabiddwa mu Lutikko e Namirembe.
Ssaabalabirizi w’ekkanisa ya Uganda Steven Kazimba Mugalu y’akulembeddemu okusaba kw’okwebaza Katonda olw’obulamu bwa Rhoda Kalema era atenderezza omugenzi olw’okwagala ennyo Katonda we n’okuweereza obulungi ekkanisa ate n’okukuza obulungi abaana.
Mu Lutikko e Namirembe, obubaka bwa Ssaabasajja Kabaka Ronald Muwenda Mutebi II gye busomeddwa Omukubiriza w’Olukiiko lwa Buganda Owek. Patrick Luwaga Mugumbule nga mu bbwo, Maasomoogi asaasidde ab’enju z’Abagenzi William Kalema eyali bba wa Rhoda Kalema n’eya eyali Katikkiro wa Buganda Martin Luther Nsibirwa ono nga ye yali azaala omugenzi Rhoda Nsibirwa Kalema.
Kabaka agamba nti omugenzi yali mpagi luwaga mu nteekateeka ez’okuzzaawo Obwakabaka era yamuli ku lusegere nnyo mu nsonga z’Amatikkira zonna.
“Maama Rhodah Kalema alese omukululo mu by’obukulembeze, ebyobufuzi, ebyenjigiriza n’embeera z’abakyala ebimanyiddwa obulungi mu Uganda ne mu Nsi yonna. Tujja kusigala nga tumwenyumirizaamu nnyo mu kulwanirira obwetwaze bw’omukyala mu Uganda” Kabaka Mutebi II.
Nnyinimu ayongeddeko nti “Omugenzi ayambye abantu bangi nga yabadde na busosoze mu bantu wadde obuli bw’enguzi, tusigale nga tumuyigirako n’okwegomba obuweereza bwe obutabaddeeko bbala nga bwe tulaba ensangi zino mu bantu abamu abaweebwa obuvunaanyizibwa.”
Omuteregga yebazizza Katonda olw’emirimu gy’akozesezza omuzaana we era n’amusaba Amuwe ekiwummulo eky’emirembe.
Ye Katikkiro wa Buganda Owek. Charles Peter Mayiga mu bubaka bwe era obusomeddwa Owek. Mugumbule mu kkanisa eno, ategeezeza nti okufa kwa Rhoda Kalema kulese eddibu ddene mu Bwakabaka ne Uganda yonna era akikaatiriza nti ono abadde ttaala y’enju ya Katikkiro Martin Luther Nsibirwa abadde akumaakuma famire yonna era akuumye obulungi ekitiibwa kya Kitaawe.
Katikkiro ono era amwogeddeko ng’omu ku bakyala abasooka okufuna obuyigirize obwawaggulu mu Uganda era nti abukozesezza bulungi n’agasa Obwakabaka, ekkanisa, eggwanga lye Uganda n’Ensi yonna. Ayongeddeko nti abadde munnabyabufuzi atumbuudde Abakyala era awadde abakyala eky’okulabirako okuyingira ebyobufuzi.
Amutenderezza okukuza obulungi abaana be, ate n’okwagala ennyo enkulaakulana mu Ggwanga, asabye Katonda amulamuze kisa amusaasire byonna ebyamusobako.
Nnaabagereka Sylvia Nagginda asinzidde wano n’ategeeza nti Rhoda Kalema abadde muntu akumaakuma abantu era anyweza oluganda nga kino ekinyonnyodde n’omukwano omugenzi gw’abadde ne famire ya Ssebuggwawo. Ono era amwogeddeko ng’omuntu awagidde ennyo emirimu gya woofiisi ya Nnaabagereka naddala Ekisaakaate era abadde muwabuzi we mu nsonga nnyingi ddala.
Pulezidenti w’Eggwanga mu bubaka bwe obusomeddwa Minisita Kabuye Kyaofatogabye, atenderezza omukululo gw’omugenzi naddala mu kusitula ekifaananyi ky’Abakyala mu Ggwanga naddala mu nsonga z’obukulembeze era agamba nti ono atadde ettofaali ddene ku kukula kwa Uganda.
Abooluganda n’emikwano gy’omugenzi bonna buli abadde ayogera ng’atendereza omukwano, obukulembeze n’obuvumu bwa Hon. Rhoda Kalema, engeri gy’abadde akumaakuma abantu, emirimu gy’akoze n’ekitiibwa ky’abadde awesa enju ya Kitaawe.
Owek. Hon. Lay Canon Rhoda Nsibirwa Kalema mu baana ba Katikkiro Martin Luther Nsibirwa yali mwana wa 13 kw’abo 25 Kitaawe be yazaala era okufa kwe kati kulese omuwendo gwa baana 2 bokka abalamu. Ono yafiirwa bba nga wa myaka 43 gyokka nga balina abaana 6 bokka era wafiiridde nga 3 ku bbo bakyali balamu.
Rhoda eyafiiridde mu ggwanga lya Kenya, omubiri gwe ne gukomebwawo mu Uganda nga 7/08 waakuziikibwa ku Lwomukaaga nga 09/08/2025 e Kiboga