Musasi waffe
Ssaabasajja Kabaka Ronald Muwenda Mutebi II aweerezza obubaka obw’okusaasira olw’okufa kw’amusajjawe Maj. Gen. Wasswa Kasirye Ggwanga.
Mu bubakabwe bwatisse minisita wa gavumenti ez’ebitundu Oweek. Joseph Kawuki, Kabaka agambye nti okufa kwa Kasirye Ggwanga ddibu ddene eri Obuganda ne Uganda kubanga abadde ayagala nnyo ensi ye.
“Tuwulidde amawulire ag’ennaku ag’okufa kw’omulwanirizi w’eddembe.. kitalo nnyo kyakusaalirwa nti afiiridde mu kiseera ekizibu ng’embeera tetusobozesa kumusiibula nga bwekisaanidde
Tusaasidde nnyo bamulekwa ne Bagandabe,” Kabaka bwagambye.
Ayogedde ku Kasirye Ggwanga ng’omusajja Abadde omukozi, omumalirivu era afaayo eri obutonde bwensi.
Ate mu bubaka bwa Katikkiro Charles Peter Mayiga era obwetikkiddwa Oweek. Kawuki, Katikkiro agambye nti Kasirye Ggwanga abadde ayagala nnyo Obwakabaka ne Kabaka we era tamuliddemu lukwe.
“Awadde eky’okulabirako ekirungi nti omuntu asobola okuweereza mu gavumenti, n’aweereza mu magye, naye naaasigala ng’atambulira ku mulamwa og’wokuzza Buganda ku ntikko,” Mayiga bweyagambye.
Agasseeko nti omugenzi abadde anywerera mu byakkiririzaamu era tabyawukanako.
Kasirye Gwanga yafa ku lwakubiri ng’aweza emyaka 68 era aziikiddwa eggulo lyaleero ku kyalo Nkene mu disitulikiti ye Mityana.