Bya Ssemakula John
Kampala
Munnamagye eyagawummula Gen. Henry Tumukunde alabudde bannayuganda okwegendereza nga balonda ku lw’ekyukakyuka eyannamaddala kubanga bangi ku basuubiza enkyukakyuka tebasobola giyimirizaawo.
Okulabula kuno Tumukunde yakukoledde mu bitundu kya Ratkoto ne Lagile mu disitulikiti y’e Pader ku Lwokusatu ng’anoonya akalulu.
“Bwe muba mulonda enkyukakyuka mubeere beegendereza kubanga abantu bangi bavuddeyo okusuubiza enkyukakyuka naye nga tebajja kugisobola, mulonde enkyukakyuka ebatwala gye mwagala okulaga.” Tumukunde bwe yategeezezza.
Tumukunde agamba nti abalonzi balina okubeera abeegendereza naddala mu kaseera kano nga Pulezidenti Museveni atabudde buli kimu n’afuula obukulembeze ekintu ekizibu.
Ono yasabye abantu mu kitundu kino bateeke abakulembeze baabwe ku nninga babalage kye babakoleddewo kubanga abamu ku bo bali mu bifo bya buvunaanyizibwa era nga bavuga emmotoka ennene naye ate ng’abantu baabwe bali mu mbeera mbi.
Tumukunde yagambye nti wadde ebikonge bingi biri mu bitundu bino naye embeera y’amalwaliro n’ebyenfuna ebadde y’emu okumala emyaka 34 egiyise.
Yannyonnyodde nti ettaka lingi mu kitundu kino terina kikolwako kubanga mu mulembe guno kizibu okukozesa enkumbi okulima n’ofunamu ekyamakulu.
Eggulo Tumukunde yafundikidde okunoonya akalulu mu kitundu kino n’asaba abantu okumulonda era nga olwaleero ku Lwokuna ali mu bitundu by’e Oyam, Kole ne Lira.