Bya Ssemakula John
Kampala
Amyuka Ssaabadumizi wa poliisi, Maj Gen. Paul Lokech, agamba nti abaalumba Gen. Katumba Wamala ne bakuba emmotoka ye amasasi agawera 50, baamala mu kitundu ky’e Kisaasi eddakiika eziwera 55 nga bamaze okukola obulumbaganyi buno naye ne balemwa okuzuulwa.
Bino Lokech abitegeezezza bannamawulire ku Lwokubiri mu Kampala bw’abadde alaga okunoonyereza we kutuuse.
Kinajjukirwa nti ku ntandikwa y’omwezi guno, abatemu abatannategeerekeka baalumba emmotoka ya Gen. Katumba Wamala ne bagikuba amasasi agaaleka nga gasse muwala we awamu ne ddereeva we.
Kino kyatabudde abantu abasinga nga kumpi buli omu anenya poliisi olw’okulemwa okubaako ky’etuukako ku batemu bano abazze batta abanene mu ngeri eno yeemu.
Leero, Gen. Lokech akkiriza ng’obulagajjavu bw’abasajja baabwe mu poliisi bwe bwayamba abatemu bano okukola ettemu lino era ne basobola n’okuvaawo nga n’okutuusa kati tebamanyiddwa.
Lokech ategeezezza nti abatemu bano basobola n’okumala akaseera mu kitundu kino okumpi ne we bakoledde, ettemu kyokka era ne batazuulwa.
“Okugeza, abatemu baamala eddakiika eziwera 55 mu bitundu bya Kisaasi- Kulambiro – Bukoto nga bamaze okukola obulumbaganyi buno.” Lokech bw’agambye.
“Singa abantu ba bulijjo ne poliisi baali bafuddeyo, abantu bano bandikwatiddwa. Abapoliisi abalawunira ku bigere, aba Ppikipiki ne kabangali zaffe eza 999, bonna tebaali bulindaala. Kino kyakosa engeri gye baanoonyaamu abatemu ne balemwa okubazingiza.” Lokech bw’agasseeko.
Lokech annyonnyodde nga kino bwe kibawadde essomo era baakuziba emiwaatwa gyonna mu by’okwerinda, okusobola okutangira ebikolwa nga bino.
Afande Lokech agamba nti bafunye ebifaananyi ebyenjawulo ebikubiddwa okusinziira ku bajulizi ab’enjawulo nga biraga abatemu bano naye n’agattako nti tebagenda kubifulumya mu kaseera kano era baakulinda okutuusa nga balina kye batuuseeko.