Bya Ssaava Kevins Kanyike
Kabowa – Kyaddondo
Omukulu w’Ekika kye Mmamba Namakaka, Omutaka Gabunga James Mubiru Zziikwa IV era Gabunga owa 38 atabukide abazzukulu abatunda ebintu by’ekika nti baagambye nti bagenda kukubwa mu mbuga z’amateeka zibalamule.
Bino abyogedde bw’abadde asisinkanye bazzukulu be ab’essiga lya Mugula Entebe nga bakulembeddwamu omukulu w’essiga lino Omutaka Lubuuzibwa John Mayombwe bano bakiise mu mbuga mu nkola y’Olutikkulo eyatandikibwawo nga buli ssiga likiika Embuga.
Munteekateeka ekika ky’Emmamba gye kyatandikawo ey’olutikkulo, abazzukulu mu kika kino bakiika mu mbuga y’omutaka Gabunga ne batwalyo ebirabo omuli ensimbi enkalu okuyambako mu ntambuza y’emirimu. Ku mulundi guno abazzukulu okuva musiga lya Mugula – Entebe nga bakulembeddwamu Omutaka Lubuuzibwa John Mayombwe be bakiise embuga ewa jjajjaabwe, era bano baleese ensimbi enkalu n’Ebintu ebyenjawulo.
Omutaka Gabunga yebazizza abazzukulu abeetabye mu lutikkulo luno, era olw’okwewaayo ne bavujjirira emirimu gy’ekika, n’abazadde abakubirizza okusomesa abaana n’okubateekateeka nga balimu obuntubulamu. Gabunga asanyukidde nnyo bazzukulu be bafubye okuweerera abaana, agambye nti omuzadde yenna afaayo n’asomesa omwana aba amutemedde omusingi omulungi mu bulamu.
Katikkiro w’Ekika ky’Emmamba Kyobe Gerald Kaberenge agamba nti ekika nga kinaakulakulaana abazzukulu balina okwetaba mu mirimu gy’ekika n’Okugivujjirira, era yebazizza abazira Mmamba olw’okujjumbira enteekateeka y’Olutikkulo.
Omumyuka Owookubiri owa Katikkiro w’Ekika ky’Emmamba munnamateeka Denis Bugaya agamba Buganda eyimiriddewo ku bika, era wano w’asabidde abazzukulu okweyunira emirimu gy’Ebika ng’akiggumiza nti Ebika bwe binywera ne Buganda eyongera okuggumira.
Omutaka Lubuuzibwa John Mayombwe ow’essiga lya Mugula – Entebe bw’abadde ayogerako eri abazzukulu abakubirizza okubeera obumu ekika kigende mu maaso ne Buganda eyongere okutinta.
Ku lw’Abamasiga mu kika kye mmamba, Omukulu w’essiga lya Wampona Nsubuga David asabye bazzukulu ba mugula okussa ennyo omulaka ku bulimi nga basoosowoza emmwanyi, n’ebirime ebirala olwo lwe bajja okwongera ku mnyingiza mu ssiga ssaako okuddukanya emirimu gy’Ekika.
Ssaalongo Mubiru David kulw’Abemituba egyetuukira obutereevu ku kasolya awanjagidde bazzukulu ba Gabunga okwettanira enkola ey’obwegaasi kyongere okubatuusa ku nkulakulana n’okugoba obwavu nga bakwatidde wamu.
Omutaka Ssemanobe owa 26 Kizito Paul akuutidde bazzukulu banne okunyweza ennono nga batandikira ku baana baabwe.
Katikkiro owe’ssiga lya Mugula – Entebbe, Nsubuga KK Lubereto alabudde bazzukulu ba Mugula ku bafere abazimba amasabo nga berimbika mu Entebbe za mugula Ono abagamba nti abantu nga abo bagala okutatana essiga lya mugula.
Ate ye Byekwaso Edward Nsubuga akubirizza abavubuka okwagala nnyo ebika byabwe nga benyigira mu mirimu egitwala ebika mu maaso n’okubikulakulanya.
Omukolo guno gwetabiddwako abaamasiga, abeemituba bannaddiini, ssaako bazzukulu ba Omutaka Ggabunga ku mitendera egy’enjawulo.