Bya Gerald Mulindwa
Bulange – Mmengo
Omumyuka Asooka owa Katikkiro wa Buganda Owek Prof. Twaha Kigongo Kaawaase, ategeezezza nti abantu abamu balowooza nti mukusaba Federo Buganda eyagala bukulembeze n’obufuzi ekintu ekitali kituufu.
“Mu Federo twagala okukola ebintu ebinayganyula omuntu wa bulijjo ate nga ffe tubirondoola kubanga tuli kumpi nnyo n’omuntu wa bulijjo,” Oweek. Kaawaase bweyanyonyodde.
Bino Oweek. Kaawaase yabyogeredde ku Bulange e Mmengo ku mukolo gw’okutongoza boodi ya ‘Emmwaanyi Terimba ku Lwokubiri lwa wiiki eno.
Kaawaase yasabye ebitundu eby’enjawulo birekebwe okukola ku nsonga zaabyo era nakakasa nga Buganda bwetajja kugenda ku ntikko okujjako nga etambulidde wamu n’abantu baayo nga ekyusa eby’enfuna byabwe n’okubaggya mu bwavu.
Mukwogera kwe, Minisita w’ettaka, obulimi n’obutondebwensi Owek Hajjat Mariam Mayanja Nkalubo, yakigumizza nga bwebalina eddimu okulaba nga basitula eby’enfuna by’abantu nga bayita mukulima emmwaanyi era nga y’ensonga lwaki abakugu baleeteddwa.
Ate ye Minisita omubeezi ow’ebyobulimi Owek Hajji Amis Kakomo, yategeezezza nga Ssaabasajja Kabaka bwayagala abantu be okudda ku mirimu ginnansangwa nga muno mwemuli n’okulima emmwaanyi.
“Obuganda buyiriddwamu endokwa z’emmwaanyi obukadde 10 nga zibaliriddwamu obuwumbi 4 n’ekitundu, abantu ba Buganda basomeseddwa okulima emmwanyi okuva ku kuziteeka mu kinnya okutuuka lwezigenda ku katale,” Minisita Kakomo bweyagasseeko.
Kakomo yalaze nga ebitundu ebirima emmwaanyi mu Buganda bwebyeyongedde nga kino kyonna kivudde ku kaweefube wa Mmwanyi Terimba.
Ono yanyonyodde nga Buganda bweyawandiisa kkampuni egula emmwaanyi okusobola okutaasa abalimi ku kubabadondola wamu n’okulaba nga eyambako okusitula omutindo gwazo
Abakugu abalondeddwa okutuula ku boodi eno kuliko; Mw. Dan Damulira nga ye Ssentebe, Dr. Ssebaggala Godfrey Lusiba mumyuka wa ssentebe, ate nga ku bammemba ye; Muky. Remmie Kisakye, Muky. Harriet Nsubuga Mpanga, Mw. Fred Luzinda Mukasa ne Mw. Isaac Ssambwa Kakyama.
Ssentebe wa boodi eno Dan Damulira, yeebazizza olwa Beene okumuwa obukulu buno era neyeyama ku lwa banne okutuukirizza obuvunanyizibwa buno kubanga okuva edda mu Buganda nga emmwanyi yeesomesa abaana.
Damulira yanyonyodde nga Buganda bweri ekimu ku bitundu ebisinga okuvaamu emmwanyi mu ggwanga era nasuubizza omulimu guno okugutambuliza ku bwenkanya n’okulaba nga abalimi bafuna ekisaanidde.