Bya Ssemakula John
Tororo
Kkooti enkulu e Tororo esindise eyavuganyaako ku bubaka bwa Tororo North mu nkomyo okumala emyaka 50 oluvannyuma lw’okusingisibwa omusango gw’okutemula eyali omuwandiisi w’ekibiina kya NRM mu kitundu ekyo mu kamyufu k’ekibiina akaaliwo mu mwaka 2020.
Akalulu ka NRM mukitundu kino kaalimu ebbugumu n’emivuyo egiwerako era gyebyagwera nga Oketcho Sinambio eyali omuwandiisi w’ekibiina mu ggombolola ye Mukuju attiddwa.
Wano poliisi yakwata Richard Ojore eyali yeesimbyewo, Moses Emojong ne Geoffrey Imai nebavunaana ogw’obutemu, obubbi obw’amaanyi awamu n’okugezaako okutta omuntu.
Okusinziira ku bujulizi obwaleeteddwa woofiisi ya Ssaabawaabi wa gavumenti, bwalaze nti nga September, 4, 2020 ku ssaawa 7 nga bali ku kamyufu ka NRM, omugenzi Oketcho yatuuka ewaali walonderwa awamanyiddwa nga Akoret B mu zzooni ya Akoret mu disitulikiti ye Tororo okukebera ku mbeera nga bweyali mu bifo ebyenjawulo ebironderwamu.
Wabula bwebaali wano, Oketcho nowa boodabooda Thomas Emukurut balumbibwa Ojore ne banne nebatandika okubalumiriza okubbira gwebaali bavuganya naye akalulu.
Sinambio yakubwa omuggo ku nsingo era nowa boodabooda Emukurut nakubwa bubi nnyo era nebamubbako ssente emitwalo 4 n’ekitundu awamu n’essimu byeyalina.
Omuwandiisi Sinambio yaddusibwa mu ddwaliro yabula nafa nga yakatuusibwayo.
Ku Lwokubiri, Omulamuzi wa kkooti enkulu Esta Nambayo bano yabasingisizza omusango gw’obutemu, n’okugezaako okutta omuntu.
Bano buli omu yasibiddwa emyaka 30 olw’obutemu wabula eyali yeesimbyewo Ojore ne Imai neboogerwako emyaka 20 egy’okugezaako okutta omuntu.
Abasatu bano beejerezeddwa omusango gw’obubbi obwamanyi olw’omuwaabi wa gavumenti okulemererwa okuleeta obujulizi obubaluma ku musango guno.
Omulamuzi Nambayo yategeezezza nti ebibonerezo bino bigenda kutambulira wamu.