Bya Musasi Waffe
Kyaddondo
Eyaliko omulabirizi w’e Namirembe, Bp Samuel Balagadde Ssekkadde afiiridde mu ddwaliro lya Kisubi Hospital akawungeezi k’olunaku lw’ eggulo.
Kino kyarangiriddwa Obulabirizi bw’e Namirembe nebutegeeza nti Omulabirizi Ssekkadde abadde amaze akaseera akawerako nga ajjanjabirwa mu ddwaliro lino.
“N’ennaku nnyingi tubatuusaako amawulire g’okufa kw’ Omulabirizi eyawummula era eyali omulabirizi ow’okuna. Omwoyo gwe Omukama agulamuze kisa,” Obubaka ku kibanja ky’Obulabirizi obwe Namirembe ku Twitter bwebusomye.
Omulabirizi Ssekkadde emirimu gy’ekkanisa yagiwummula mu 2009 oluvannyuma lw’okumala emyaka 16 mu bulabirizi bwe Namirembe era ono yasikirwa Omulabirizi Wilberforce Kityo Luwalira.
Ssekkadde awerezza ekkanisa okumala emyaka 50 era abadde amanyiddwa nnyo olw’okukunga abasumba n’obulabirizi obw’enjawulo okutandikawo Puloojekiti ezisobola okuyimirizaawo obuweereza bwabwe baleme kutunuulira biweebwayo.