Bya Pauline Nanyonjo
Bulange – Mmengo
Abantu ba Kabaka mu ggombolola z’e Kyaddondo, Kooki ne Buddu bakiise Embuga n’oluwalo olusobye mu bukadde 60.
Ku lwa Katikkiro, Minisita Israel Kazibwe Kitooke era Omumyuka Ssentebe w’enteekateeka z’okujaguza amatikkira ga Kabaka ag’emyaka 32, ayanjulidde abakiise Embuga ebitegekeddwa mu kujjukira bwe giweze emyaka 32 nga Kabaka Ronald Muwenda Mutebi II atudde ku Nnamulondo ya Bajjajjaabe.
Owek. Isreal Kazibwe Kitooke ategeezeza nti emikolo emitongole egyakakasidwa kuliko; ebyoto by’abavubuka mu buli ssaza nga ekyoto ekikulu kya kubeera mu Kyaddondo, waliwo ensiisira z’ebyobulamu, ensiisira z’ebyamateeka, okussa enkizo ku muzannyo gwa ‘Golf’ nga guzanyibwa mu bisaawe ebyenjawulo, okugulawo ekizimbe kya CBS PEWOSA e Buddu, okusaba mu masinzizo ag’enjawulo n’emikolo emikulu ku muzikiti e Kibuli era nayo wajja kubaayo okusaba kw’okwebaza Katonda olw’ekkula lino. Akuutidde abantu okwetaba mu nteekateeka zonna.
“Obumu bwe butufudde abamaanyi era bwe butufudde ab’ettendo, oluusi abamu bwe batulaba benyamira naye ffe nga Abaganda tusigadde tuli bumu” Minisita Kazibwe bw’ayogedde ng’akubirizza Obuganda okwongera okubeera obumu.
Minisita Kazibwe taleseeyo kukoona ku kirime kya mmwanyi, eky’ekyewanisiza abalimi emitima olw’ebbeeyo eyongera okukka, abagumizza nti ebbeeyi okugwa kiyinza okuba kiva ku bantu abangi kati abafulumya ekirime kino naddala nga n’Ensi ya Brazil eyafuna okusoomoozebwa gye buvuddeko kati yakomyewo ku katale, abasabye bbo bongere kufulumya mmwanyi ya mutindo, abantu bagiyaayanire, akatale kajja kuddamu okusituka.
Minisita wa Gavumenti ez’Ebitundu Owek. Joseph Kawuki alaze obwetaavu bwa buli muntu okusitukiramu okuwagira emirimu gya Ssaabasajja naddala okuyita mu nteekateeka ya Luwalo Lwaffe olwo Buganda eyongere okudda ku ntikko.
Omubaka omukyala owa Wakiso Betty Ethel Naluyima yebazizza Obwakabaka olw’amaanyi agateereddwa mu kulambika enkuza ennungi mu baana okuyita mu bibiina ebitali bimu nga Nkobazambogo, Akeezimbira n’ebirala.
Eggombolola okubadde Mut.VI mukulu wa kibuga, Musaale Busukuma, Ssaabaddu Lwamaggwa ne Mut. XIII Kisekka ge galeese obukadde obusobye mu Nkaaga (60,950,930) kwossa n’amasomero okuli Mackay College Nateete, Aunt Claire Kindergarten, Rock of Joy Primary school, New Kabaale Busega, London High School namala mangi.
