Bya Samuel Stuart Jjingo
Namirembe –
Obwakabaka busabye abali emitala w’amayanja okutambuliza obufumbo ku nnonno n’obuwangwa bwa Buganda baleme kukoppereza nneeyisa y’abazungu eziviiriddeko obufumbo bw’abantu abawerako okusasika.
Obubaka buno Minisita wa Gavumenti ez’Ebitundu Oweek. Joseph Kawuki abuweeredde mu Lutikko e Namirembe bw’abadde akiikiridde Katikkiro mu kusaba okutegekeddwa nga Mark Kaddu Ssengooba agattibwa ne Tracy Lynnet Naggayi.
Minisita Mawuki asiimye nnyo abagole bano olw’okubeera nti wakati mu muyaga oguli ebweru ogw’obufumbo obw’ebikukujju gye bawangaalira belondobyeyo ne basalawo okufumbiriganwa. Abeebazizza nnyo olw’okuleeta embaga yaabwe awaka ku butaka ekifanaanyi ekyoleka nti benyumiriza nnyo mu kubeera abaana Abaganda era bassa ekitiibwa mu nnono n’obuwangwa bwa Buganda.
Yebaziza Taata wa kawasa Mw. Joel Ssengooba, nga ye mu mubaka w’Omutaka w’Ekika ky’Embogo Jjajja Kayiira e Stockholm, amwebazizza olw’okukuza abaana be nga baagala obuwangwa bwabwe n’asaba abagole nabo batambuze omukululo guno mu baana baabwe ne mu bantu abalala.
Ssaabalabirizi w’Ekkanisa ya Uganda the most Rev. Dr. Stephen Kazimba Mugalu, y’agasse abagole bano, abasabye obutayawulwa ssente mu bufumbo bwabwe n’akubiriza omugole omukyala Lynnet okukwatirako omwami we mu mbeera zonna ne mu by’ensimbi.
Ssaabalabirizi ategeezeza abagaole nti obufumbo bwe bayingidde baasanidde okubukwata n’amagezi ag’awaggulu olwo lwe bujja okubanguyira olw’okuba nti ensangi zino bangi babuyingira nga n’abangi befunyiridde okubufuluma olw’okusoomoozebwa okubujudde.
Okusaba kuno kwetabiddwako abaami b’amasaza; Omubaka wa Ssaabasajja Kabaka ow’e Sweden Oweek. Nelson Mugenyi, owa Rhinelands Oweek. Sam Ssekajjugo, Kaggo Hajj. Ahmed Matovu Magandaazi, Katambala Hajj. Sulaiman Magala n’abantu abalala.