Bya Gerald Mulindwa
Mpigi
MINISITA w’obuwangwa, ennono, olulimi n’ebifo eby’enkizo mu Bwakabaka bwa Buganda, David Kiwalabye Male avumiridde ekiwamba bantu ekiriwo n’alabula nti kino kyandituusa eggwanga awabi.
“Ekiwamba bantu kisusse, bwe waba waliwo bye bakola ebitajja, nze mpulira wabeerawo gye bayita ‘Presidential Pardon.” Pulezidenti lwaki tabasonyiwa kuba y’akyali mu ntebe,” Owek. Kyewalabye bwe yabuuzizza.
Kino kiddiridde abantu abawerako obuzibwayo abantu abagambibwa okubeera ab’ebyokwerinda olw’ebigambibwa nti bano bawagizi ba munnabyabufuzi Robert Kyagulanyi Ssentamu.
Bino Owek. Kyewalabye yabyogeredde Mawokota mu Mpigi eggulo ku Lwokusatu ng’aggulawo omusomo gw’okubangula abakulembeze b’ennono ku ngeri y’okusakiramu abantu baabwe abakulembeddwa Omulangira Namuyonjo.
Omusomo guno gwategekeddwa ab’ekitongole kya Prometra Uganda e Buyijja mu Mawokota. Owek. Kyewalabye era asinzidde wano n’avumirira abalemesa eddagala eryaffe ery’ekinnansi okunoonyerezebwako ate nga lisobola bulungi okutaasa ensimbi ezigenda mu kugula eddagala ly’abazungu era n’obulabe bwalyo si bw’amaanyi.
Ono agamba nti amaanyi okusinga gateereddwa ku ddagala ly’ekizungu ate ng’eddagala egganda nalyo likola.
Owek. Kyewalabye annyonnyodde nti Buganda w’etuuse yeetaaga enkola ya Federo esobole okwekolera ku nsonga zaayo mu bujjuvu era eyongere okuyamba abantu baayo okukulaakulana.