Musasi waffe
Ekitongole ekikola ku makomera mu ggwanga ekya Uganda Prisons Service olwaleero nga kiyita mu mwogezi waakyo, Frank Baine kikkirizza abantu abalina obuyambi bw’emmere bwe baagala okuwa Abasiraamu okubayambako mu kusiibulukuka okugenda mumaaso bakikole.
Baine abadde ayogerako eri Bannamawulire ku kitebe ky’essengejjero ly’amawulire ga gavumenti ekya Uganda Media Centre, ategeezezza nti abo abanaatwala emmere baakugireka ku wankaaki era abasirikale baabwe bebajja okugitwalira abasibe.
“Tumujja na bannamawulire kubanga kino mukikola kusiima Allah, sikubalaba okuleka nga bannamawulire bebagiwaddeyo,” Baine bweyategeezezza.
Okuva ekirwadde kya coronavirus bwekyabalukawo, amakomera gonna okwetooloola eggwanga lyonna gaawera abagenyi bonna okukyalira abasibe.
Abasiraamu baatandika okusiiba ssabbiiti ewedde ng’era ekisiibo kyabwe kimala ennaku 30.
Wabula eky’omulundi guno kyajjidde mu kusoomoozebwa okw’amanyi olw’ekirwadde kya coronavirus.
Bw’osomera bino nga Uganda erimu abantu abamanyiddwa okuba ne coronavirus 81 newankubadde nga 47 bamaze okussuuka.