Bya Shafik Miiro
Bulange – Mmengo
Abasaakaate abasoba mu 600 bebasimbuddwa okwolekera essomero lya Janan School e Bombo mu Bulemeezi gyebagenda okumala akabanga nga babangulwa ku nnono z’obuntubulamu wamu n’emirimu egitali gimu.
Bano batuuse ku mbuga enkulu e Bulange e Mmengo ku makya g’Olwomukaaga era baaniriziddwa Minisita wa woofiisi ya Nnaabagereka, Owek. Cotildah Nakate Kikomeko wamu n’abakungu abalala aba Nnabagereka Development Foundation.
Mu kwogerako gyebali, Minisita Kikomeko yeebazizza abazadde olw’okujjumbira enteekateeka eno, gy’agambye eyamba nnyo kubanga abaana bagunjulwa mu bintu eby’enjawulo omuli; Obuntubulamu, okukolgana ne bannaabwe mu mirimu, okuyiga obuwangwa, ennono ne tekinologiya ng’era omulamwa gw’omwaka guno bwe guli.
Owek. Nakate yeebaziza Nnaabagereka Sylvia Nagginda olw’enteekateeka eno gy’agambye nti egasse ku bulamu bw’abantu bangi mu mirundi ekkumi n’omusanvu (17) egiyise nga ku guno ogw’ekkumi n’omunaana (18), ebibala byakwongera okulabwa.
Ssenkulu wa Nnabagereka Development Foundation, Omuk. Adrian Mukiibi, alambuludde ku mulamwa gw’ekisaakaate 2025, ategeezeza nti ensi ensangi zino yeetanidde nnyo tekinologiya, ekireetaawo okwebuuza butya obuwangwa bwebusobola okukuumibwa mu nsi ekyukakyuka.
Omuk. Mukiibi agamba nti abaana bagenda kuweebwa obusobozi okutegeera obulungi tekinologiya ne bwebasobola okumukwanaganya n’obuwangwa bwabwe, bongere okubutegeera n’okubagazisa abalala.
Ye Ssaabagunjuzi w’ekisaakaate, Owek. Rashid Lukwago ategeezezza nti Ekisaakaate kizze kitambulizibwa ku miramwa egy’enjawulo era nga ne ku mulundi guno omulamwa ogwalondeddwa gugendererwamu kunnyikiza ensonga ya butya omwana bw’asobola okweyambisa tekinologiya okutumbula Obuwangwa. Ayongeddeko nti Abasaakaate baakuyambibwako okwezuula obusobozi bwabwe mu bintu eby’enjawulo olwo babikozese okwesitula mu bulamu obwa bulijjo.
Kitegeerekese nti ku ssomero lya Janan wagenda kubaayo emisomo egy’enjawulo okuva mu bagunjuzi abawerera ddala 100, era mu biseera eby’enjawulo Maama Nnaabagereka asuubirwa okulambula abaana bano naye abeeko emisomo gy’abawa, Katikkiro wa Buganda Charles Peter Mayiga naye bwatyo n’abagenyi n’abantu abalala.
Ekisaakaate 2025 kyakumala ssabbiiti bbiri (2) okuva nga 4-18 Gatonnya era kyakutambulizibwa mu mulamwa ‘Okukwanaganga Obuwangwa ne Tekinologiya’. Kino kyetabwamu abaana wakati w’emyaka 6-18, abawala n’abalenzi nebabangulwa mu bintu ebyenjawulo.