Bya Shafic Miiro
Kasubi – Nabulagala
Ekkeleziya ya Pere Simeon Lourdel Mapeera esangibwa e Kasubi – Nnabulagala ejaguza emyaka 145 bukya emmisa eyasookera ddala mu byafaayo by’eddiini y’Obukatuliki esomebwa mu ggwanga Uganda.
Ebijaguzo biyindidde Nnabulagala leero ku Lwokubiri ng’era bitandise nekitambiro ky’ emmisa ekisomeddwa Ssaabasumba Paul Ssemogerere era nga n’abaana abawerera ddala 338 basembezeddwa omulundi gwabwe ogusooka ogwa Eucalistia.
Bw’abadde ayigiriza Ssaabasumba Paul Ssemogerere agambye nti olunaku luno lwetaaga okwefumiitirizaako kuba lwelwaliko Eucalisitia eyasookera ddala mu ggwanga.
Ono asabye abantu bulijjo okwekuba mukifuba kwebyo ebigaanye okutambula obulungi basobole okudda eri Omukama nga bayita mukwenenya.
Ssaabasumba Ssemogerere bano abannyonnyodde nti awatali Eucalisitia okusembera, emmisa wamu n’okufuna Omukama byandibadde tebisobola kubaawo kuba esakalamentu lino lyeri bawa obulamu.
kulwa Kamalabyonna, Owek Noah Kiyimba ayozaayozezza Ekleziya olw’okujaguza kuno era nakakasa nti Ssekabaka Muteesa I yalengera wala era nga mpagi luwaga mukusima omusingi gwa Ekleziya munsi Uganda.
Owek. Kiyimba annyonnyodde nti okubeera mukifo kino kubeera kwejjukanya ku byafaayo bya Ekleziya wamu n’Obwakabaka bwa Buganda bwatyo naasaba abantu bulijjo okusabira Pere Simeon Lourdel Mapeera ne Brother Delmas Amans (Amansi) ne Ssekabaka Muteesa olw’omulimu gwebakola.
Ono alabudde abakristu okupima ebigambo ebibavaamu wamu n’abakulembeze era nakubiriza bannabyafuzi okuggya Kabaka ne Ekleziya mu buzannyo bwabwe naye bafube okukozesa Tekinologiya obulungi.
Omubaka wa Lubaga North , Abubaker Kawalya yeebazizza abakyala olw’okufaayo ennyo ku baana babwe n’okubaagazisa eddiini nga balwana okulaba nti bavaamu abantu ab’omugaso.
Ono ayogedde ku nguzi esusse mu ggwanga n’ebikolwa by’omukwano ogw’ekivve nategeeza nti bino byonna bitadde ebiseera by’eggwanga eby’omu maaso mu katyabaga.