Gavumenti eyimirizza okudda kwa Bannayuganda abakonkomalidde mu mawanga amalala olw’ekirwadde kya Coronavirus.
Okusinziira ku kiwandiiko ekifulumiziddwa minisitule y’ensonga z’ebunaayira, okuva enkya nga July 4, teri muntu yenna agenda kukkirizibwa kuyingira ggwanga oluvannyuma lw’ebifo gyebakuumibwa biyite kalantiini okujjula.
Minisitule ekola ku nsonga z’ebyobulamu yassaawo ebifo 37 mu Kampala ne Entebbe abantu bano gyebalina okukuumibwa nga birina ebisenge ebisulwamu 2500.
Kiteeberezebwa nti abantu abasukka 1500 be bagenda okukosebwa enteekateeka eno.
Bano bali mu mawanga nga Qatar, UAE, China ne Malaysia. Bano babadde basuubirwa okutuuka mu ggwanga wiiki eno.
Ambassador Patrick Mugoya, omuwandiisi owenkalakkalira mu minisitule y’ensonga z’ebweru yategeezezza nti bajja kuddamu okukkiriza Bannayuganda okudda okwaboobwe, oluvannyuma lwa minisitule y’ebyobulamu okukola kwabo abaamaze okudda mu ggwanga.
Kyali kirowoozebwa nti buli sabbiiti bbiri, abantu 300 bebagenda okudda mu ggwanga naye mu sabbiiti emu yokka, abantu abasukka mu 300 bebaakomyewo mu ggwanga.
Bano bonna balina okuteekebwa mu kalantiini okumala sabbiiti bbiri.
Abo abakomyewo bava mu mawanga nga South Africa, Turkey, India, United Kingdom, Switzerland, Italy, Sudan ne United Arab Emirates.
Enkya Bannayuganda okuva e New Dehli mu India basuubirwa okuttuka mu ggwanga.
Kwabo abaakadda, 13 basangiddwamu ekirwadde kya coronavirus.
URN