Bya Musasi waffe
Moroto
Akulira amakomera mu ggwanga, Dr. Johnson Byabashaija agumizza bannayuganda ng’abasibe abaatolose mu kkomera lya Singila e Moroto bonna bwe bagenda okukwatibwa mu bwangu era nga tewali nsonga lwaki abatuuze mu kitundu kino balina okutya.
Bino Byabashaija yabyogeredde Moroto ng’alambula ekkomera lino eggulo ku Lwokusatu n’asuubizza abali ku muyiggo gw’abasibe ekirabo kya kakadde kamu n’ekitundu ku buli mmundu ezuulwa ku ezo 15 ate ng’omusibe addamu okukwatibwa amugabako emitwalo 50.
Byabashaija oluvannyuma lw’okulambula ekkomera lino yakkiriza nga bwe waabaddewo obunafu ku by’obukuumi bw’ekkomera lino era nga baali baalemwa okuteeka ebintu ebimu mu nkola ekyayanguyiriza abasibe bano okutoloka.
Ono yasuubizza ng’abatolose bwebagenda okukwatibwa mu bwangu nga nebwebanaddukira ku nsi ez’omuliraano bajja kubanonayo.
“Njagala okutegeeza abasibe abatolose nti essaawa yonna tujja kubafuna, nga bwetwakata abaali batolose mu Arua ne Bukwo.” Byabashaija bweyagambye.
Byabashaija yannyonnyodde nti ekkomera lino teribadde na Munaala omukuumi kw’alina okulabira abasibe bonna nawa gye balaga ate nga n’omukuumi waalyo era nga n’omukuumi wa ggeeti y’ekkomera teyabadde mu katimba nga kyayanguye abasibe bano okumutuukako.
“Singa twabadde n’Omunaala ekizibu kino tekyandibaddewo kubanga omukuumi yandisobodde okubakubamu amasasi ng’asinziira ku munaala waggulu nebatatoloka, tugenda kuteekako akatimba akookubiri okwongera okunyweza obukuumi bwalyo.“ Byabashaija bwe yagambye
Ono yategeeezezza nti alagidde omumyuka wa Kamisona w’amakomera okukola ku nsonga zino mu bwangu okusobola okwewala ensobi mu maaso.
Yalaze nga bwe baamaze edda okukwatako abasibe 16 ate ng’abalala 7 bo battiddwa nga bagezaako okubakwata.
Amyuka omwogezi w’eggye lya UPDF mu ggwanga Lt. Col Deo Akiiki yategeeza Sabbiiti ewedde nga UPDF bwe yali eyitiddwa okuyambako poliisi n’abamakomera okunoonya n’okukwata abasibe bano abaali batolose n’emmundu nebambuka mu nsozi z’e Moroto.
UPDF yayungula basajja baayo wansi n’ennyonyi nezireetebwa mu bwengula era ng’ebikwekweto bino bikulembera aduumira ekibinja ekyokusatu mu ggye lino, Brig. Joseph Balikuddembe.