Bya Ssaava Kevins Kanyike
Kamugambwa-Buddu
Bannamutimbagano abegattira mu kibiina ki ‘Buganda Yiyo Buganda Yange’ batonedde essomero ‘Pookino Nursery School’ e Kamugombwa mu Buddu ebintu ebikosebwa mu kuyingiza amasanyalaze mu bizimbe by’essomero eryo nga ebikozesebwa babikwasiza Omumyuka Owookusatu owa Pookino Omw. Muwanga Dick ng’ono y’avunanyizibwa ku kulabirira amasomero gano.
Omwami w’Essaza Buddu Pookino Jude Muleke akuutidde abavubuka b’ekibiina kya Buganda Yiyo Buganda Yange okunywerera ku mirimu gye bakola naddala egyo egivaamu ensimbi nga tebawankawanka kuva ku guno ne badda ku mulala.
“Emirimu egisinga okuginyweza tulina kugiremerako kuba abantu abasinga bwe bakola emirimu nga tegiyingiza nsimbi mu kiseera kitono nga bagivaako naddala abavubuka olwo ne bamaliriza munsi muno nga tebalina webanyweredde kyokka emirimu eginagasa tugiremerako ebbanga lyonna nga tulina ebiruubirirwa ne birooto” Owek. Muleke.
Pookino abavubuka bano taleseeyo kubajjukiza kulonda kyokka abasabye obutalonza kinyumo wabula beekenenye abo be bateekamu obwesige okukyusa embeera zaabwe nga abavubuka.
Omumyuka Owookusatu Pookino Muwanga Dick era avunanyizibwa ku ssomero lya Pokiino Nursery School asiimye nnyo abavubuka ba Buganda Yiyo Buganda Yange olw’emirimu gye bakola nga beyambisa omutimbagano okusingako abo abazze batyobola Nnamulondo, ate ne balafubana okulaakulanya Obwakabaka mu ngeri ezitali zimu.
Ssentebe wa Buganda Yiyo Buganda Yange Munaawa Dan alaze nti Ssaabasajja yasiima n’awa abantu be amasomero kyokka ate obuvunanyizibwa bw’okugayimirizaawo buli eri bbo nga abavubuka beyakwasa omulembe gwe kale bbo kwe kusalawo okugatta ettofaali ku masomero ga Bbene. Ono mu ngeri y’emu yeyamye ku lw’ekibiina ky’akulembera okutalaaga amasaza gonna nga bawaayo ebikozesebwa nga bye bawaddeyo e Buddu.
Omuwanika wa Buganda Yiyo Buganda Yange Omumbejja Nattu Dorothy alaze nti bayayana okusitula omutindo gwa masomero mu masaza, kye bava baasalawo okubakwasizaako n’amasanyalaze okuyamba abayizi okusoma obulungi.
Amasomero ku mutendera gwa nnasaale mu ggwanga gasuubirwa okuddamu okusomesa abayizi mu mwezi ogwokubiri mu lusoma olusooka olw’omwaka.