Bya Ssemakula John
Mmengo – Bulange
Obwakabaka bwa Buganda nga buyita mu kibiina ky’olulimi Oluganda kikwataganye n’amatendekero agawaggulu okulaba engeri gye basobola okukuuma ekitiibwa ky’olulimi Oluganda.
Kino kirangiriddwa Minisita avunaanyizibwa ku buwangwa, ennono, olulimi Oluganda awamu n’ebyokwerinda, Owek. David Kyewalabye Male, mu lukung’aana n’ebibiina by’enjawulo olutudde e Bulange- Mmengo ku Lwokubiri.
“Twagala kukwatagana tulabe, tuyinza tutya okutumbula olulimi Oluganda. Twagala okusomesa n’okwagazisa abaana naye tewali agenda kwagala kintu kigenda kumuleetera bizibu.” Owek. Kyewalabye bw’annyonnyodde.
Minisita Male agamba nti Obwakabaka bwagala Oluganda kuba lwe lugenda okunyweza ennono n’Obuwangwa bwaffe era lulung’amye n’ennono.
Owek. Kyewalabye ategeezezza nti olulimi Oluganda luzze lukyuka olw’okwetabulamu ennimi endala wamu n’ebintu okukyuka, ng’abavubuka bangi balina ebigambo bye bagungizzaawo.
Kyewalabye agamba nti ne mu matendekero agayambye ennyo okukuuma olulimi luno, gasanze okusoomoozebwa okunene kyokka n’ageebaza olw’okulemerako.
Ono asabye ekibiina ky’olulimi Oluganda okufuba okulaba ng’abantu batumbula olulimi naddala mu kulambika abantu ku mpandiika naddala ku mannya gaabwe kubanga nayo nsonga nkulu.
Owek. Male abakuutidde banyweze obumu era bakkaanye, kiyambe okubbulula olulimi Oluganda naddala mu masomero n’amatendekero agawaggulu.
Abeetabye mu lukung’aana luno bakulembeddwamu ssentebe w’ekibiina ky’olulimi Oluganda, Omuk. Lukabwe Fred Kisirikko, anokoddeyo ebitongole ebivunaanyizibwa ku lulimi Oluganda wamu n’ebintu bye birina okukola, okukakasa nti olulimi terusaanawo.
Enteekateeka eno yeetabiddwamu abantu batono olw’ekirwadde kya Ssennyiga corona eyazinda eggwanga.