Bya Ssemakula John
Kampala
Omukulembeze w’ekibiina kya National Unity Platform (NUP), Robert Kyagulanyi amanyiddwa Bobi Wine, agamba nti Pulezidenti Museveni ali mu bbanga kuba amawanga g’ebweru batandise okumusosola.
Bino Kyagulanyi yabyogedde oluvannyuma lwa Pulezidenti Museveni okutegeeza ng’ayita ku mutimbagano gwa Twitter nti asisinkanye abakwanaganya ne bannakibiina kya NUP mu maka g’obwapulezidenti e Ntebe.
Museveni yagambye nti bano bamulaze ebimu ku bintu NRM by’eremeddwa okukola era n’abasuubiza nti ebizibu bino bajja kubikolerako wamu nga ttiimu.
Mu kwanukula ku Twitter, Bobi Wine yategeezezza nti kano kakodyo ka Museveni emyaka gyonna egiyise nga alaga abantu balimba nti babeera basaze eddiiro ekitali kituufu.
“Ono omubbi w’akalulu era nnakyemalira akola buli kimu okusobola okulongoosa ekifaananyi kye. Alemeddwa okumanya nti obudde bwamuyitako, mu kalulu akawedde baatuuka ne kussa erifuna abajaasi ne babambaza ebyambalo bya NUP okulaga nti abantu baffe basaze ne beegatta ku NRM.” Kyagulanyi bwe yagambye.
Bobi Wine yannyonnyodde nti Pulezidenti Museveni ali ku kyokya era awangaalira mu kutya kubanga kkooti y’ensi yonna ewozesa emisango gya Nnagomola ejja ku mwetaaga ate nga n’amawanga agamu ag’ebweru agabadde gakolagana naye gamusuddewo.
“Ategeka okwerayiza wiiki ejja mu bukyamu era yenna takyalina kitiibwa. Atandise okusikayo obumu ku bukodyo bwe obukadde asobole okwenaazaako enziro mu maaso ga bannansi be bamu batirimbudde, bawambye awamu n’okutulugunya,” Bobi Wine bwe yagasseeko.
Kinajjukirwa nti n’okutuusa kati Kyagulanyi akyakalambira nti obuwanguzi bwe bwanyagibwa Pulezidenti Museveni ng’akozesa akakiiko k’ebyokulonda era ne bweyasalawo okuddukira mu kkooti era teyafunayo bwenkanya.