Bya Ssemakula John
Iganga
Eyeesimbyewo ku kkaadi ya National Unity Platform (NUP) ku bwapulezidenti, Robert Kyagulanyi Ssentamu aka Bobi Wine, ayimbuddwa ku kakalu ka kkooti etudde e Iganga leero ku Lwokutaano.
Kyagulanyi eyakwatibwa e Luuka nga anoonya akalulu, yaggaliddwa mu kkomera e Nalufenya ku Lwokusatu okutuusa olunaku lwaleero, kkooti lw’emuyimbudde.
Ono avunaanibwa omusango gw’okukuba olukung’aana olumenya amateeka wamu n’okujeemera ebiragiro bya Ssennyiga Corona.
Bw’alabiseeko mu maaso g’omulamuzi wa kkooti ento e Iganga, emisango gyombi agyegaanye.
“Ndi wano okugamba Museveni nti tetuli baddu mu ggwanga lyaffe, Uganda nsi yaffe era tujja kuginunula.” Kyagulanyi bw’agambye.
Kyagulanyi ayimbuddwa ku kakalu ka kakadde kalamba akatali kabuliwo ate abamweyimiridde ne basasibwa obukadde butaano ezitali za buliwo
Oluvannyuma lw’okukwata Kyagulanyi abantu beekalakaasizza era ng’olunaku lw’eggulo we lwazibidde ng’abaakafa baweze 38 nga poliisi egezaako okubagumbulula.
Ku Lwokusatu n’Olwokuna abavubuka baggala amakubo n’okwokya ebipiira mu nguudo era kyawaliriza abamagye okuyingira mu nsonga eno okuyambako poliisi okunyweza emirembe.
Waliwo n’obutambi bw’abantu abaabadde bambadde engoye eza bulijjo abaalabiddwako nga bakutte emmundu era nga bagezaako okutugumbulula abantu abaabadde beekalakaasa.
Ab’ebyokwerinda baakutte Kyagulanyi ku Lwokusatu ku bigambibwa nti yabadde amenya ebiragiro ebitangira Ssennyiga Corona ng’akung’aanya abantu.
Yonna Bobi Wine gy’ayise ng’akuba enkung’aana abantu babadde bamukung’aanirako era nga kino kizze kitabula abawagizi b’ekibiina ekiri mu buyinza ekya National Resistance Movement (NRM).
Bwe yabadde e Kotido, Pulezidenti Museveni yagambye nti abantu abaabadde beekalakaasa olwa Bobi Wine okukwatibwa baabadde bakozesebwa abagwira abatayagala Uganda kutebenkera.