Bya Ssemakula John
Bulange – Mmengo
Ssaabasajja Kabaka Ronald Muwenda Mutebi asiimye nawaayo ebitabo ebiwandiikibwamu eri essaza lye Buvuma okusobola okutumbula ebyenjigiriza mukitundu kino n’okumalawo ebbula ly’ebikozesebwa abayizi byebasanga.
Ebitabo bino, Katikkiro Charles Peter Mayiga yabikwasizza bikwasiddwa Minisita w’Enkulaakulana y’Abantu ne Woofiisi ya Nnaabagereka, Oweek. Prosperous Nankindu Kavuma, olweggulo ku Lwokuna mu Bulange – Mmengo.
“Ndi musanyufu okukwasa ebitabo bino, Ssaabasajja Kabaka byawadde abantu be ab’e Buvuma. Waliwo obunafu mu byenjigiriza mukitundu kino. Wadde twagala Abavuma bavube naye twagala abaana basooke mu masomero. Abaana bwebasoma baba basobola okuvuba naye ate era basobola okukola emirimu gyonna emirala,” Katikkiro Mayiga bw’ategeezezza.
Owek. Mayiga ategeezezza nti abaana abalenzi mu Buvuma balina okuteekebwako amaanyi kuba bebasinga okutwalibwa n’okusikirizibwa okuvuba nebeerabira eby’okusoma.
Obwakabaka era buwaddeyo Enkuluze y’Oluganda ng’erina ebigambo mu Luganda n’olungereza okusobozesa abo abaagala okuyiga ennimi zombi okubanguka.
Ebitabo ebiweereddwayo bisobye mu 5000, era nga Dr. Nankindu, asanyukidde enteekateeka eno gy’agambye nti yakwongera amaanyi mu kutumbula ebyenjigiriza.
Omukolo gw’okuwaayo ebitabo bino gwetabiddwako Omumyuka Asooka owa Katikkiro, Owek. Robert Waggwa Nsibirwa ne Minisita w’Amawulire mu Bwakabaka, Owek. Noah Kiyimba.