Bya Racheal Namuli
Busiro – Wakiso
Abantu ab’enjawulo mu ggombolola y’e Katabi mu disitulikiti y’e Wakiso babukeerezza nkokola okufuna obujjanjabi obw’obwerere nga egimu ku mikolo egikulembeddemu amazaalibwa ga Beene mu nkola etuumiddwa ekyoto.
Ku byoto bino ebiyindidde mu ggombolola ez’enjawulo, abantu basomeseddwa ku ndwadde ya Mukenenya n’engeri ez’enjawulo mwe basobola okugyekuuma.
Akiikiridde Minisita w’eby’obulamu, Dr. Prosperous Nankindu Kavuma ku mukolo guno, Kiwuka Viola ategeezezza nti obulwadde bwa Siriimu bwegirisiriza nnyo mu bitundu bya Buganda nga noolwekyo abantu bonna balina okusitukiramu okubulwanyisa.
Ono alaze okutya olw’okuba nti ekirwadde kino kisinga mu baana bawala, abavubi ne banneekolera gyange bw’atyo n’asaba abaami okulowooza ennyo ku bulamu bw’abaana abawala bweba basazeewo okwetaba mu bikolwa by’omukwano.
Omwami wa Kabaka owoomuluka gw’e Nalugala nga ye Ssaabaddu Tonny Bukenya asinzidde wano n’akalaatira abavubuka obutakebeza maaso na kutebereza wabula bajjumbire okwekebeza wamu n’okukozesa obupiira obugabiddwa.
Ono abasabye n’okusoosowaza olulimi Oluganda nti kubanga abavubuka bagenda balutyoboola ate nga lyeggwanga eryenkya, ekintu ekiteeka ebiseera bya Buganda ebijja mu katyabaga.