Bya Ssemakula John
Bulange – Mmengo
Omumyuka asooka owa Katikkiro, Owek. Twaha Kaawaase Kigongo ategeezezza Obuganda nti Nnyinimu Ssaabasajja Kabaka Ronald Muwenda Mutebi II asiimye okulabikako eri Obuganda ng’abaami b’amagombolola awamu n’abamyuka baabwe beeyanza obwami.
Owek. Kaawaase agamba nti omukolo guno gugenda kuyindira mu Lubiri e Mmengo ng’ennaku z’omwezi 16 omwezi guno (March) era ng’abagenda okweyanza obwami bawerera ddala 350 nga bano kwe kuli abaamagombolola n’abamyuka baabwe wonna mu Buganda.
Ekirangiriro kino Kaawaase akikoledde mu Bulange e Mmengo ku Lwokuna bw’abadde ayogerako eri bannamawulire okubalambulira ku nteekateeka eno ng’awerekeddwako Ssaabawolereza Christopher Bwanika, Minisita Noah Kiyimba, Minisita Joseph Kawuki, Minisita Nankindu n’abalala.
“Nga bwe mumanyi nti okuviira ddala mu Museenene wa 2019 Beene yasooka n’alonda abaamasaza n’abamyuka baabwe ate era n’asiima n’alonda abaamagombolola n’abamyuka baabwe nga 7/09/2021 wabula babadde tebanneeyanza bwami obwo. Era abawerera ddala 350 bagenda kweyanza obwami obwo nga 16/03/2022.” Owek. Kaawaase bw’ategeezezza.
Ono ategeezezza nti abagenyi abookwetaba ku mukolo guno bagenda kubeera abo abayite olw’ensonga nti eggwanga likyali mu mbeera y’ekirwadde kya Corona era omukolo gugenda kukwatibwa wakati mu kugoberera ebiragiro ebitangira ekirwadde kino.
Owek. Kaawaase annyonnyodde nti omukolo guno gugenda kulemberwamu eddiini y’abasiraamu nga Supreme Mufti y’ajja okukulemberamu n’okuwa Obuganda essaala era abagenyi b’ Omutanda bajja kusanyusibwa mu ngeri ez’enjawulo era oluvannyuma Omutanda agabule Obuganda.