Bya Ssemakula John
Kampala – Kyaddondo
Minisita w’ebyamawulire n’okulung’amya eggwanga, Dr. Chris Baryomunsi avumiridde enneeyisa ya bannayuganda abatandise okujaganya olw’okufa kw’abadde Sipiika wa Palamenti Jacob Oulanyah.
Oulanyah yalangiriddwa nti yafiiridde mu ddwaliro e Seattle mu kibuga Washington ekya Amerika gy’abadde amaze ebbanga ng’ajjanjabwa.
Abamu ku bannayuganda baagenze ku mutimbagano ne batandika okwogerera omugenzi amafuukuule era waliwo n’abasaagidde mu kufa kwe.
Minisita Baryomunsi ategeezezza bannamawulire mu Kampala nti kino kikyamu era bannayuganda bonna balina okuvaayo okukivumirira.
“Waliwo bannayuganda abatalina mutima gulumirirwa naye kye bakola si kya buntubulamu. Tuvumirira abo abakozesa omutimbagano okujaguza olw’okufa kwa Sipiika Jacob Oulanyah.” Baryomunsi bw’ ategeezezza.
Ono abawadde amagezi okwegatta bakungubagire Oulanyah mu kifo ky’abamu okujaguza nga bo abatagenda kumusangayo.
Okusinziira ku Baryomunsi, enkya gavumenti yaakufulumya enteekateeka z’okuziika Sipiika Oulanyah era ensonga y’okumuziika mu bitiibwa yeemu ku bigenda okuteseebwako mu kkabineeti olwaleero era omulambo gwa Oulanyah gusuubirwa mu ggwanga mu nnaku 3 oba 4.