Bya Ssemakula John
Kampala
Abazadde bakubiriziddwa okukuuma abaana mu kiseera kino ng’amasomero gakyali ku muggalo okulaba nga tebonooneka.
Bino byogeddwa Katikkiro w’ebyalo bya Kabaka, Omukungu Moses Luutu bw’abadde atikkula abantu ba Kabaka okuva e Kikamulo mu Bulemeezi, Amakula mu Lubiri e Mmengo ku Lwokuna.
Bano abakulembeddwamu Omumyuka owookubiri owa Kangaawo, Omwami Nkonge Ddamulira Aaron wamu n’Omwami w’eggombolola y’e Kikamulo omuggya, Lutalo Yiga Moses, bategeezzeza nti babadde balina okutuukiriza obuvunaanyizibwa buno.
Katikkiro w’ebyalo bya Kabaka, omukungu Moses Luutu era abeebaziza okumanya ennono yaabwe ate ne bafaayo okugituukiriza.
Omukungu era asinzidde wano n’akubiriza abazadde okufaayo ennyo okukuuma abaana baabwe naddala mu kiseera kino nga batudde waka nga tebasoma baleme kwonooneka.
Omwami w’eggombolola y’e Kikamulo omuggya, Lutalo Yiga Moses aloopedde omukungu ebituukiddwako mu ggombolola ye wamu n’ebibasoomoozezza.
Omumyuka owookubiri owa Kangaawo, Omwami Nkonge Ddamulira Aaron wamu ne Ssentebe w’eggombolola y’e Kikamulo, Ssaalongo Ssenono Robert Bogere bategeezezza nti abantu ba Kabaka okubeera obumu y’engeri yokka ejja okuzza Buganda ku ntikko.
Enteekateeka y’okuleeta Amakula ebeerawo buli Lwakuna era eggombolola ez’enjawulo okuva mu masaza ga Ssaabasajja bakiika n’ebintu ebyenjawulo okuli; ebisolo, emmere n’ebintu ebirala.