Bya Ssemakula John
Kyengera
Poliisi y’e Kyengera mu Wakiso ekutte omutuuze w’e Kyengera agiyambeko mu kunoonyereza ku bigambibwa nti ye yasse omulaalo Manizabayo bwe yamukubye enkumbi ku mutwe n’afiirawo.
Omukwate ye Mugabi Frank nga mutuuze w’e Kyengera Mugongo A nga kigambibwa nti ono yavudde mu mbeera n’akuba omulaalo Manizabayo Elia Vian, 25, abadde akola ewa Mary Wosula akakumbi ku mutwe akaamuttiddewo.
Amyuka Omwogezi wa poliisi mu Kampala n’emirilaano Luke Owoyesigyire yategeezezza nga ettemu lino bwe libaddewo leero ku Lwokubiri ku makya.
“Kigambibwa nti, Frank Mugabi omugenzi yakubiddwa akakumbi ku magulu gombi ne ku mutwe era n’afiirawo,” Owoyesigire bwe yannyonnyodde.
Okusinziira ku Owoyessigire, Mugabi baamukutte dda era nga akuumirwa ku Poliisi y’e Kyengera.
“ Abakugu ba poliisi abanoonyereza baatuuse dda mu kifo ewaabadde ettemu, era bamaze okukung’aanya obujulizi.” Owoyesigire bwe yagambye.
Ono yagasseeko nti Mugabi bagenda kumutwala akeberebwe omutwe okulaba oba mulamu n’oluvannyuma asimbibwe mu mbuga z’amateeka.
“Ababaddewo batubuulidde bye balabye era nga mu kaseera kano omulambo gutwaliddwa mu ggwanika e Mulago okusobola okugwekebejja.” Owoyesigyire bwe yakakasizza.