Bya Ssemakula John
Kampala
Pulezidenti Yoweri Kaguta Tibuhaburwa Museveni, kyaddaaki alangiridde kabineeti empya gy’agenda okukola nayo mu kisanja, kino erabise nga yeewuunyisizza bantu ab’enjawulo olw’abo abagirabikiddemu n’abo abasuuliddwa.
Olukalala luno olwafulumiziddwa eggulo ku Lwokubiri, omumyuka wa Pulezidenti Edward Kiwanuka Ssekandi abadde mu kifo kino okumala emyaka 10 y’omu ku basuuliddwa era ono yawangulwa ku bubaka bwa Palamenti bwa Bukoto Central.
Ssekandi asikiziddwa eyali minisita w’ebyenjigiriza, Jessica Alupo.
Abadde Ssaabaminisita Ruhakana Rugunda naye takomyewo wadde ng’ensonda zaategeezezza ng’ono bwe yali yasaba mukama we obutamuzza ku kifo kino, ono asikiziddwa ne Robinah Nabbanja.
Abadde Minisita w’ensonga ez’ebweru, Sam Kuteesa abadde mu kifo kino okuva mu 2005 naye asuuliddwa n’asikizibwa Gen. Jeje Odongo abadde mu minisitule y’ensonga z’omunda mu ggwanga.
Okusinziira ku lukalala luno, Minisita w’ensonga z’Obwapulezidenti, Esther Mbayo naye takomyewo ng’ono asikiziddwa Mariam Dhoka Babalanda ate Gen. Elly Tumwine naye asikiziddwa Jim Muhwezi.
Abadde Ssaabawolereza wa gavumenti, William Byaruhanga, ekifo mw’abadde kitwaliddwa Kiryowa Kiwanuka ate Mary Gorreti Kitutu n’asikizibwa Ruth Nankabirwa nga Minisita w’ebyamasannyalaze.
Amelia Anne Kyambadde eyaakawangulwa mu kalulu ka Mawokota North naye asikiziddwa Francis Mwebesa nga Minisita w’ebyobusuubuzi, amakolero n’obwegassi.
Adolf Mwesigye, abadde minisita wa difensi n’abaazirwanako naye takomyewo era ekifo kye kirekeddwa nga kikalu, ate era ne Minisita Godfrey Kiwanda naye erinnya lye lisuuliddwa mu kasero.
Mu ngeri y’emu, Minisita Nakiwala Kiyingi, Beti Kamya, Sarah Kanyike ne Ronald Kibuule abadde minisita w’amazzi awamu n’abalala, nabo basuuliddwa.