Bya Ssemakula John
Kampala
Poliisi mu ggwanga efulumizza ebifaananyi ebigambibwa okulaga enfaanana y’abatujju abaalumba ekifo ekisanyukirwamu e Komamboga ne batega bbomu eyatta omuntu omu n’erumya n’omulala.
Bw’abadde ayogerako ne bannamawulire mu Kampala, Omwogezi wa poliisi, Fred Enanga ategeezezza nti oluvannyuma lw’okubuuza abantu abeerabira ku basajja bano abali abasatu nga bateekawo bbomu, basobodde okusiiga ebifaananyi okuyambako okuzuula abantu bano.
” Ebifaananyi bye tusiize tubiggye mu kubuuza abeerabirako era abakugu baffe ebifaananyi bino babikubye okusinziira ku baaliwo bye bannyonnyodde. Tekitegeeza nti bano be batujju bennyini naye beefaananyiriza bwebatyo. Tugenda kusigala tukwata abantu, tusunsulamu okutuuka lwe tunaafuna abatemu bennyini.” Enanga bw’annyonnyodde.
Okusinziira ku poliisi, bbomu zino ezaali ku kifo awasiikirwa embizzi zaalina akakwate n’abatujju ba ‘Allied Democratic Forces’ abaasimba amakanda mu Congo wabula nga balina be bakolagana nabo mu kibuga Kampala.
Kinajjukirwa nti mu mwaka 2017, poliisi eriko ebifaananyi bye yafulumya ku bantu abagambibwa okutemu AIGP Andrew Felix Kaweesi, ddereeva we awamu n’omukuumi we.
Bw’abuuziddwa oba abantu abeefaananyirizaako abaasiigibwa mu bifaananyi baamala ne babafuna, Enanga agambye nti tekyasoboka wabula n’ategeeza nti ebifaananyi ekika kino biyamba kinene.
Enanga asabye oyo yenna ayinza okumanya abantu bano oba abalina amawulire okubatuukirira ku nnamba 112/999 or 0800122291.
Afande Enanga agamba nti ebikwekweto bikyagenda mu maaso okuzuula abo bonna abalina akakwate ku batujju ba ADF era baliko n’abantu abawerako be bakutte okubaako bye bannyonnyola.