Bya Musasi Waffe
Kabale
Olutalo lw’okuwangula akamyufu ka National Resistance Movement lutabuse oluvanyuma lw’omu ku babadde beesimbyewo okuvaamu nga alumiriza Minisita David Bahati okubba akalulu kano nga tekanakubwa.
Nicholas Tuesday Arineitwe nga abadde ayagala bbendera ya NRM eya Ndorwa East yavudde mu lwokaano nga alumirizza Bahati okukakwatamu nga tebanaba nakulonda.
Olwokaano luno lulimu; Simpson Mpiriirwe, Mark Raizo Mashemererwa ne Minisita David Bahati wabula Olwokusatu welwazibidde nga Arineitwe abivuddemu. Ono yawandikidde Omuwandiisi w’ekibiina ku disitulikiti e Kabale nategeeza nga bwatagenda kuvuganya mu kalulu kano akagenda okubaawo ku Lwokutaano.
Arinietwe yasabye akakiiko k’ebyokulonda mu NRM kalemeddwa okunoonyereze ku bya Minisita Bahati okukyusa enkalala z’abalina okulonda era nga nabagenda okulondesa mu ggombolola ezisinga bamanyiddwa mu lwattu nti bawagizi ba Minisita Bahati.
Omuwandiisi w’ekibiina e Kabale Maurice Mugenga Keitaba yakakasizza nga bweyafunye ebbaluwa ya Arineitwe nga ekakasa nga bwavudde mu lwokaano.
Akulira eby’amawulire mu kibiina Edison Turyagabwa yawakkanyiza ebyogerwa Arineitwe nategeeza nti akakiiko k’ebyokulonda e Kabale keetengeredde era kajja kulaga obwenkanya.
Ono ye muntu ow’okubiri okuva mu lwokaano nga akamyufu ka NRM kasembedde nga eyasooka ye Dixon Kagurusi Ampumuza, eyabadde yeesimbyewo ku bubaka bwa palamenti e Kinkiizi West. Ono yalumiriza abamu ku b’ebyokwerinda okumutiisatiisa era nasalawo kaadi y’ekibiina agireke yeesimbewo ku lulwe nga omuntu.
Ampumuza yali avuganya n’omubaka James Ruggimana Kaberuka, Julius Mbabazi, Gregory Mugabe, Vanansio Mujuni Monday ne Adon Kahinda.