Bya Kintu Noah
Ssembabule
Abatuuze mu bitundu eby’enjawulo ebikola disitulikiti ya Ssembabule, balaajanidde ab’obuyinza okubayamba ku b’ebyokwerinda abasusse okubatulugunya mu kaseera kano ak’okulonda, olw’okwawukanya endowooza mu by’obufuzi.
Bano bino baabyogeredde mu lukiiko olwakubiddwa ab’ekitongole kya Centre for Conflicts Solution mu ttawuni kkanso y’e Ssembabule ku Cristo Center.
Olukung’aana luno olwabaddemu ab’ebyokwerinda, abeesimbyewo wamu n’abalonzi, lwagendereddwamu okulondoola okulonda bwe kutambula mu kitundu kino, n’okulaba awali ekizibu.
Wano munnakibiina kya NUP, Ibrahim Mpuuga we yasinzidde n’ategeeza nti bo ng’aba NUP mu kitundu kino, batulugunyizibwa ab’ebyokwerinda, ekiraga kyekubiira ate nga balina okuweereza bannayuganda bonna.
Abamu ku baabadde mu lukiiko bategeezezza ng’abakulu mu kitundu kino, bwe bakozesa emmundu n’abapoliisi okulagira abatuuze okubaako abantu be bawagira, ekintu ekikyamu.
Omutuuze Happy Kafiriyooko yagambye nti wadde baatwala emisango ku poliisi olw’abantu abaabatulugunya mu kamyufu ka NRM, naye tewali kyakolebwa era nga batya nti ebikolwa bino, biyinza okuddamu mu kalulu ka bonna aka 2021.
Omu ku bavuganya mu kitundu kino, Kisekka, teyalumye mu bigambo bye bwe yategeezezza nti Minisita Sam Kuteesa ne poliisi be batabudde buli kimu mu kitundu kino.
Kisekka yannyonnyodde nti bangi ku bantu mu kitundu kino basibiddwa era nti yawandiikidde Ssaabaduumizi wa poliisi, Martin Okoth Ochola, nga yeemulugunya ku nsonga eno.
Wabula bino akulira poliisi y’e Ssembabule, Luka Mbusa, yabiwakanyizza n’ategeeza nti tafunanga ku musango gwonna ng’omuntu yatulugunyiziddwa poliisi.
Ku lw’abakozi mu Ssembabule, Pamera Kobutungi yasabye abantu mu kitundu kino okunyweza obumu kubanga buli omu yeetaaga munne.
Omukungu Centre for Conflicts Solution, Patrick Bwire, yagambye nti ekyabaleese kwe kulaba nga batabaganya abantu bano era n’asuubiza okwongera emisomo mu kitundu kino, kitaase ku biyinza okuddirira.
Omubaka wa Pulezidenti e Ssembabule, Nickson Kabuye, yeeyamye okufuba okulaba ng’ekitundu kino tekiddamu buvuyo bwa byakulonda mu kalulu ka bonna aka 2021.
Yasabye abali ku ludda oluvuganya gavumenti, okuteekawo enkolagana ennungi n’abeebyokwerinda, kiyambe okunyweza emirembe mu kitundu kino.