Bya Kato Paul
Masaka
Omu ku bakulembeze b’obuyisiraamu mu ttundutundu ly’e Masaka, District Khadhi w’e Masaka, Sheikh Swaibu Ndugga, alaajanidde Pulezidenti Yoweri Kaguta Museveni ayingire mu nsonga za RCC Fred Bamwine ku ngeri gy’akolamu emirimu gye kuba gigenda kwongera okukyayisa gavumenti ye.
Okwogera bino, Sheikh Ndugga yasinzidde mu maka ge e Bisanje mu Masaka mu kusaala Eid Adhuha eyeetabiddwako abamu ku bali ku lukiiko lw’akulembera nalwo obusiraamu mu kibuga Masaka.
Sheikh Ndugga agamba nti Bamwine ayingidde mu buli kimu awatali kwebuuza ku muntu yenna era nga yabamalako ebyewungula bwe yaggala omuzikiti omukulu mu kibuga Masaka awatali kwebuuza ku muntu yenna akwatibwako ku nsonga eno.
Ono yalaze ng’Obusiraamu bwe buli mu kunyigirizibwa mu kitundu kino olwa RCC Bamwine kuba yagaana okugoberera amateeka n’emitendera emituufu, nga buli kimu akikola kulaga maanyi.
Mu ngeri yeemu, Sheikh Swaibu Ndugga, yasabye abasiraamu okweyambisa olunaku luno olwa Eid bongere okusabira Ssaabasajja Kabaka, Katonda amuwe obulamu obulungi, n’amwebaza olwenkulaakulana gy’atadde mu Buganda mu myaka 28 ng’ali ku Nnamulondo.
Okusaala kuno kwakulembeddwamu Imaam w’omuzikiti omukulu e Masaka, Sheikh Abbasi Nseera era ono mu kuyigiriza kwe yennyamidde olwa fitina esusse mu bayisiraamu, gy’agamba nti ebaviiridde okufiirwa ebintu bingi naddala okuva mu gavumenti.