Bya URN
Abatuuze mu kitundu ky’e Lango beeraliikirivu oluvanyuma lw’enzige okulumba ebitundu by’e Karamoja ebibaliranye.
Obweraliikirivu buno buvudde ku mawulire agaategeezezza nti enzige zino zaabadde zirabiddwako mu disituliki y’e Abim eriranye Kapelebyong ne Amuria eziri mu Teso saako Otuke ne Agago ebiri mu Lango.
Enzige zaatuuse mu
Uganda okuva e Kenya nga ziyitira mu disitulikiti y’e Amudat, Nakapiripirit ne
Nabilatuk mu Karamoja ku ssande.
Eggulo ku Bbalaza, gavumenti yaweerezza liita z’eddagala
18,000 mu Amudat nga lino lyakufuuyira enzige nga bakozesa ennyonyi, wamu n’e
bbomba.
Abakulembeze b’e
Lango bagamba nti tebalina busobozi bwenganga nzige zino.
Akulira eby’obulimisa mu distulikiti y’e Dokolo, Geoffrey Okaka agamba nti essuubi
lyabwe lyonna balitadde mu gavumenti ya wakati okulwanyisa enzige zino.
Ssentebe wa disitulikiti ye Alebtong, Okello John Bosco agamba ekitundu kye kyolekedde okugwibwamu enjala ani amuwadde akatabe, singa enzige zino zituukayo.
Okusinziira ku kitongole ky’ensi yonna ekikola ku by’emmere ekya Food and Agriculture Organisation-FAO, ekibinja ky’enzige ekimu kisobola okubaamu enzige obukadde 40 era nga kisobola okutambula kilomita eziwera 150 olunaku olumu.
Ekitundu ky’e Lango kirimu disitulikiti mwenda omuli; Alebtong, Amolatar, Apac, Dokolo, Kole, Lira, Oyam, Otuke ne Kwania.