Bya Ssemakula John
Kampala
Pulezidenti Yoweri Kaguta Museveni alidde mu ttama ku bantu abasusse okumwogerera nga bamusaba agende n’ategeeza nti bano tebalina byakukola.
“Abantu abo abang’amba okugenda, mulowooza sirina gyendaga. Olumu nneebuuza lwaki bawoggana, baagala mmere oba lutalo.” Museveni bwe yagambye.
Bino Museveni yabyogeredde mu Ankole ng’asisinkanye abakulembeze b’ekibiina okuva mu Bushenyi, Rubirizi, Sheema, Mitooma ne Buhweju, eggulo ku Lwokubiri ku ssomero lya St. Kaggwa Primary School e Bushenyi.
Museveni yabadde awerekeddwako mukyala we, Janet Museveni ng’anoonya akalulu mu nkola ya Ssaayansi era n’asaba abantu okubeera obumu era beegatte nga East Africa ne Africa.
“NRM yatandika dda okubalabula ku busosoze, tukolerere obumu bwa East Africa ne Africa tusobole okufuna akatale akanene eri ebyamaguzi byaffe. Bw’eba nga China erina abantu abasoba mu kawumbi, enoonya obutale okuva ewalala, lwaki si ffe abalina obukadde 40 obw’abantu?” Museveni bwe yabuuzizza.
Museveni yategeezezza nti okuva mu 1986 lwe baakwata obuyinza, baliko ebintu ebirabika bye bakoze era nga baggulawo ebyenfuna eri abantu ssekinnoomu, ekintu ekiyambye okukuza eggwanga nga bakung’aanya emisolo.
Ono yagambye nti olw’obukulembeze bwa NRM obulungi, kati gavumenti ya Uganda esobola okweyimirizaawo singa ekizibu ky’enguzi kibeera kikoleddwako era n’embalirira n’ekolebwa bulungi nga batunuulidde ebyo ebisinga okwetaagibwa.
Museveni yasabye abakulembeze okutuukiriza obuvunaanyizibwa bwabwe nga bayamba abantu okweggya mu bwavu era babasabe okulima emmere naye nga bafissaawo ey’okutunda.
Museveni yasinzidde eno era n’aggulawo oluguudo lwa Mitooma n’olwa Katabi Seminary nga zino zonna zaazimbiddwa gavumenti.
Bo bannabyabufuzi mu kitundu kino baasiimye Pulezidenti Museveni olw’okukulaakulanya ensi wamu n’okuwa bannayuganda emirembe.
Bano baamusuubizza okwongera okusaggula buli wamu okulaba ng’addamu okutwala obuyinza mu kalulu ka 2021.