Ndeeba
Omulabirizi we Namirembe . Rt. Rev. Wilberforce Kityo Luwalira alaze okunnyolwa olw’okumenyebwa kw’ekkanisa ya St. Peter’s mu Ndeeba.
Ekkanisa eno ebadde emazeewo emyaka egiwera 40 yamenyeddwa mukiro ekyakeesezza olwaleero, nga erudde nga ekayanirwa omugagga amanyiddwako erya Dobovico era nga ebadde ekuumibwa poliisi.
“Leero tukeeredde mukunyolwa olw’ekkanisa eyamenyeddwa mu Ndeeba, kyenyamiza okulaba nga ensonga eno ebadde egobererwa okuva mu 1981 bweti byebasazeewo ogikomekerezza. Ffenna tuli mu bulumi naye okusingira ddala abakulisitaayo b’ ekkanisa ya St. Peter’s”, Omulabirizi Luwalira bweyategezezza.
Luwalira yagasseeko nti endabika y’ekkanisa eno ebadde eraga bulungi amaanyi abakulisitaayo b’omukitundu kino gebassaamu okugizimba kyokka nga gonna gasanyiziddwawo mu ddakiika entono.
Yasabye abakulisitaayo okunywerera ku Katonda naye era beegendereze akaseera kano abantu mwebasaliddewo okukola ebya Sitaani.
Luwalira yasabye abantu bonna abeetabye mu kubba ettaka wonna mu ggwanga okweddamu era nategeeza nga ebikoleddwa mu Ndeeba bwebitasobola kuziyiza kusaasaana kwa njiri.
Ate ye omwogezi wa poliisi mu Kampala n’emirilaano Patrick Onyango yategezezza nga abadduumizi bapoliisi mukitundu kino 3, bwebamaze okukwatibwa olw’okulagajalira emirimu gyabwe
Abakwate kuliko; akulira poliisi y’e Katwe David Epedu, akulira poliisi ya Ndeeba Yeko Kato ne Isabirye Kaloli nga naye muddumizi mu poliisi mu Kampala n’emirilaano.
URN