Bya Shafik Miiro
Buddu
Olukiiko olulondoola enteekateeka ya Nnamutayiika w’Obwakabaka olukulemberwa, Omumyuka Asooka owa Katikkiro Owek. Prof. Twaha Kaawaase Kigongo lulambudde emirimu egikolebwa ku mbuga ya Pookino okuli Ekisaawe ky’Obwakabaka ne Pookino Nursery School.
Okulambula bano bakukoze ku Mmande wansi w’ enteekateeka y’okukuba ttooci okulaba ebyategekebwa okukolebwa okuva mu mwaka gwa 2023 okutuuka kati webituuse.
“Olukiiko olulondoola okulaba wa wetutuuse mukussa mu nkola enteekateeka Nnamutayiika. Tuzze e Masaka nga tugenda kweggalira okumala ennaku ssatu, tutunuulire byetwateekateeka okukola okuva 2023, tulabe tutuuse wa, bwewabaawo ebigaanye tumanye nsonga ki era tusaze magezi ki okugenda mu maaso,” Owek. Kigongo bw’akkaatirizza.
Owek. Kaawaase yeebazizza Pookino olwa Puloojekiti y’Ekisaawe ne Pookino Nursery School kubanga zino ziteereddwawo mu buyiiya nayamba okutaasa ettaka lino ku bantu abaali baagala okulyezza olwo Obuganda nebusobola okugenda mu maaso.
Ono annyonnyodde nti webanaviira e Buddu bajja kuba bamaze okumanya webasobodde okutuuka kibayambe okumanya kyebalina okuzzaako.
Olukiiko luno kuliko; Owek. Prof. Twaha Kaawaase Kigongo, Owek. Robert Waggwa Nsibirwa, Omukubiriza w’Olukiiko lw’Abataka Omutaka Nnamwama Augustine Kizito Mutumba, Ababaka mu Lukiiko lwa Buganda, Ssentebe wa Bassenkulu Omuk. Roland Ssebuufu, Omuky. Josephine Nantege Omuwandiisi ow’enkalakkalira mu woofiisi ya Katikkiro n’Omumyuka we ne ba mmemba abalala
